​Bank VTB (Azərbaycan)-ın Sumqayıtda filialı açılıb

Bakı. 28 noyabr. REPORT.AZ/ Noyabrın 28-də Bank VTB (Azərbaycan)-ın əhalisinin sayına görə ölkənin üçüncü böyük şəhərində müştərilərə bank xidmətləri göstərəcək Sumqayıt filialının açılış mərasimi keçirilib. Bununla da Bank VTB (Azərbaycan) özünün sayca 13-cü filialını istifadəyə verib ki, bu, həm də bankın Bakıdan və Abşeron yarımadasından kənarda ilk filialıdır. Bu barədə "Report"a bankın mətbuat xidmətindən məlumat verilib.

Yeni filial Sumqayıt şəhəri, 34-cü kvartal, 50.1 ünvanında fəaliyyətə başlayıb.

Tədbirin açılış mərasimində Bank VTB (Azərbaycan)-ın İdarə Heyətinin və Müşahidə Şurasının üzvləri, "VTB Qrup"un və "AtaHolding”in təmsilçiləri, fəxri qonaq qismində Sumqayıt Şəhər İcra Hakimiyyətinin nümayəndələri iştirak edib.

Xatırladaq ki, Bank VTB (Azərbaycan) ASC VTB Bank ASC-nin törəmə bankıdır. Bank VTB (Azərbaycan) ASC-nin səhmdarları: VTB Bank ASC və “AtaHolding” ASC-dir. Bank VTB (Azərbaycan) ASC əsasən korporativ, kiçik və fərdi biznesi təmsil edən müştərilərə xidmət göstərir. Bu gün bank 13 filial və baş ofis yanında müştəri xidmətləri idarəsi ilə təmsil olunur.