"Bank Respublika"nın illik zərəri 4,5 dəfə artıb

Bakı. 19 yanvar. REPORT.AZ/ "Bank Respublika" ASC-nin aktivləri illik 2,08% artaraq bu il yanvarın 1-nə 912,117 mln. manata çatıb.

Bu barədə "Report" Bankın illik maliyyə hesabatına istinadən xəbər verir.

Hesabata əsasən, ötən il "Bank Respublika"nın kredit portfeli 12,54% azalaraq 283,174 mln. manat olub. Qeyri-standart (vaxtı keçmiş) kreditlərin portfeldə xüsusi çəkisi əvvəlki ilin əvvəli ilə müqayisədə 1,9% bəndi azalaraq yanvarın 1-nə 10,0% təşkil edib. Bu kreditlərin həcmində isə illik 26,52% azalma qeydə alınıb.

Maliyyə ilində hüquqi şəxslərin depozitləri 24,93% artaraq 361,855 mln. manat, fiziki şəxslərin depozitləri isə 29,1% azalaraq 189,961 mln. manat olub.

Bankın məcmu kapitalı illik 15,33% azalaraq cari il yanvarın 1-nə 51,677 mln. manat, I dərəcəli kapitalı isə 23,31% azalaraq 31,64 mln. manat təşkil edib.

"Bank Respublika" ötən il 34,609 mln. manat zərər edib ki, bu da əvvəlki illə müqayisədə 4,5 dəfə artım deməkdir. Bankın xalis əməliyyat mənfəəti isə əvvəlki illə müqayisədə 20% azalaraq 22,318 mln. manat olub.

2016-cı ildə "Bank Respublika"nın faiz gəlirləri 29,19% azalaraq 43,952 mln. manat, qeyri-faiz gəlirləri 76,82% artaraq 35,024 mln. manat, faiz xərcləri 17,27% artaraq 26,51 mln. manat, qeyri-faiz xərcləri 3,9% azalaraq 30,149 mln. manat olub.