Bank Ombudsmanı ilə Almaniya Əmanət Banklarının Beynəlxalq Əməkdaşlıq Fondu arasında görüş keçirilib

Bakı. 22 sentyabr. REPORT.AZ/ Bank Ombudsmanı İkram Kərimov Almaniya Əmanət Banklarının Beynəlxalq Əməkdaşlıq Fondunun inzibati ofisində fondun ölkə üzrə nümayəndəsi Eduard Şmitlə görüşüb. 

“Report”a daxil olan məlumata görə, görüşdə Bank Ombudsma katibliyinin və Fondun nümayəndələri iştirak edib.

İ.Kərimov Azərbaycanda yeni yaradılmış Bank Ombudsmanının fəaliyyəti, görülmüş işlər haqqında məlumat verib, qarşıya qoyulmuş məqsədlərə nail olunması yolları müzakirə edilib. 

E.Şmit isə Almaniyada fəaliyyət göstərən Regional Bank Ombudsmanları, onların səlahiyyətlərinə aid olan işlər, verdiyi qərarların təsir mexanizmi haqqında məlumat verib, təcrübə mübadiləsi aparılıb.

Görüş zamanı iki tərəfli görüşlərin davamlı olaraq keçirilməsi, Bank Ombudsmanı sahəsində çalışan mütəxəssislərin təcrübə mübadiləsi aparılması məqsədi ilə həm Almaniyada, həm də Azərbaycanda görüşlərin təşkil edilməsi və əməkdaşlığın daha geniş müstəvidə aparılması haqqında razılaşma əldə edilib.

Qeyd edək ki, Bank Ombudsmanın yaradılması haqda qərar Azərbaycan Banklar Assosiasiyasının (ABA) Ümumi Yığıncağının bu il aprelin 3-də keçirilən iclasında qəbul edilib. Eyni zamanda, həmin iclasda Bank Ombudsmanın Əsasnaməsi və Reqlamenti təsdiq olunub. Hazırda Bank Ombudsmanı 24 bank və 1 bank olmayan kredit təşkilatı üzrə daxil olan məsələlərə baxır. Həmçinin digər banklarla, onların müştəriləri olan fiziki şəxslərin iştirakı ilə mübahisələrin baxılmaq üçün Bank Ombudsmanına verilməsi haqqında Bəyənnamənin imzalanması üzərində danışıqlar aparılır.