Bakıda "Transfer qiyməti: tətbiqi və beynəlxalq təcrübə" mövzusunda konfrans keçirilib

Bakı. 26 sentyabr. REPORT.AZ/ Bu gün Bakıda Azərbaycanda Amerika Ticarət Palatası (AmCham) və Böyük Dörtlüyün (“Deloitte Azerbaijan”, “EY Azerbaijan”, “KPMG Azerbaijan” və “PwC Azerbaijan”) birgə təşkilatçılığı ilə “Transfer qiyməti: tətbiqi və beynəlxalq təcrübə” mövzusunda konfrans keçirilib. Bu barədə “Report”a “AmCham”dan məlumat verilib.

Məlumatda deyilir ki, 2017-ci ildə Azərbaycanda transfer qiymətlərinin müəyyən edilməsi və tətbiqi barədə qaydalar qəbul edilib və cari ilin fevral ayından qüvvəyə minib. Konfransın əsas məqsədi transfer qiymətinin tətbiqini dəstəkləmək və bu sahədə beynəlxalq təcrübənin öyrənilməsi olub.

Tədbiri giriş sözü ilə “AmCham”ın prezidenti Nuran Kərimov açıb.

Azərbaycan Vergilər Nazirliyi Beynəlxalq əməkdaşlıq və maliyyə institutlarında vergi monitorinqi Departamentinin baş direktoru Zaur Fətizadə Azərbaycanda transfer qiymətinin tətbiqi ilə bağlı Vergilər Nazirliyinin həyata keçirdiyi işlər haqqında konfrans iştirakçılarına məlumat verib.

Konfransın ilk təqdimatı “Deloitte Russia”nın vergi üzrə direktoru Aleksey Sobçuk tərəfindən “Rusiyada TQ-nin inkişafı, Rusiyanın ilk TQ audit təcrübəsi və TQ-nin tətbiqinin ilkin mərhələsində vergi ödəyicilərinin ümumi səhvləri” mövzusunda edilib və daha sonra “Deloitte Azerbaijan”ın baş meneceri Nərmin Aslanova “TQ təhlilinin inkişaf etməkdə olan ölkələrdə praktiki çətinlikləri” mövzusunda öz fikirlərini iştirakçılarla bölüşüb.

Növbəti təqdimat “EY Ukraine”in TQ üzrə partnyoru İqor Çufarov tərəfindən “TQ məqsədləri üçün müqayisəli əməliyyatlar barədə məlumat. Ümumi qaynaqlara və məlumat bazalarına baxış. Ukrayna və MDB ölkələrinin təcrübəsi” mövzusunda edilib, onun ardınca “EY Azerbaijan”ın baş meneceri Ülvi Yusifov “Azərbaycan TQ Qaydaları çərçivəsində əməliyyatların müxtəlif növləri üçün müqayisəli əməliyyatlar barədə məlumatların kazuslarla araşdırılması” mövzusunda çıxış edib.

Daha sonra konfransa xüsusi qonaq qismində dəvət edilmiş Ukrayna Dövlət Fiskal Xidmətinin Audit Departamentinin TQ şöbəsinin rəhbəri Nikolay Mişinə söz verilib. O, Ukraynada TQ qaydalarının tarixi, qəbul edilməsi və tətbiqi barədə təqdimat edib. Bununla yanaşı, N.Mişin bu sahədə Vergilər Nazirliyi və özəl sektorun əməkdaşlığının əhəmiyyətdən bəhs edib.

Növbəti olaraq “KPMG Niderland”ın TQ üzrə partnyoru Yens Karreman “Niderlandda TQ üzrə sənədləşdirmə, inkişafın 15 ili. Azərbaycan üçün tövsiyələr” mövzusunda, “KPMG Niderland” digər əməkdaşı Maurits Stuyt isə “Öncədən qiymətləndirmə razılaşmaları – vergi ödəyiciləri və vergi orqanları arasında TQ üzrə qarşılıqlı əlaqə” mövzusunda təqdimatla çıxış ediblər.

Tədbirin son təqdimatları “PwC Kazakhstan”ın Avrasiyada TQ üzrə rəhbəri Anuar Muxanov tərəfindən “Avrasiyada TQ-nin inkişafı” və “PwC Azerbaijan”ın TQ üzrə meneceri Rəşad Abbasov tərəfindən “Azərbaycan TQ Qaydaları biznesə necə təsir edə bilər” mövzularında edilib.