"Azərqarant Sığorta"nın yığımları 53% artıb

Bakı. 18 noyabr. REPORT.AZ/ Bu ilin yanvar-oktyabr aylarında "Azərqarant Sığorta" ASC-nin yığımları 323 179 manat təşkil edib. Şirkətdən "Report"a verilən məlumata görə, bu, ötən ilin eyni dövrü ilə müqayisədə 52,79% çoxdur.

Hesabat dövründə "Azərqarant Sığorta"nın ödənişləri isə azalıb. Belə ki, Şirkət 10 ay ərzində 988 manat ödəniş edib. Bu isə illik müqayisədə 41,47% azdır.

Cari ilin yanvar-oktyabr aylarında "Azərqarant Sığorta" topladığı hər 100 manat sığorta haqqının 0,31 manatını müştərilərinə geri qaytarıb. Bu nisbət 2015-ci ilin yanvar-oktyabrında 0,8 manat olub.

Xatırladaq ki, "Azərqarant Sığorta" 1993-cü ildə yaradılmış "Şərqə Qapı Sığorta" MMC-nin hüquqi varisidir. Onun nizamnamə kapitalı 5,61 mln. manatdır. Bu məbləğ hər birinin nominal dəyəri 561 manat olan 10 000 səhm əsasında formalaşıb. Şirkətin səhmləri 100% Oqtay Abbas oğlu Əliyevə (Direktorlar Şurasının sədri) məxsusdur.

"Azərqarant Sığorta" bu aydan fəaliyyətini dayandırıb. Buna səbəb Şirkətin kapital çatışmazlığı problemi ilə üzləşməsidir. Onun öhdəliklərinin yerinə yetirilməsi üçün komissiya yaradılıb.