Yuxarı
    Bağlamaq

    Azərbaycanda pensiyaların maliyyələşməsinə ÜDM-in 4,9%-i sərf ediləcək

    Bakı. 3 noyabr. REPORT.AZ/ Azərbaycanda 2018-ci ildə pensiyaların ödənilməsi xərclərinin ümumi daxili məhsulun (ÜDM) 4,9%-i qədər olacağı proqnozlaşdırılır.

    “Report” bu barədə növbəti ilin büdcə layihəsinə istinadən xəbər verir.

    Pensiyaların maliyyələşdirilməsinə 2018-ci ildə ÜDM-in 4,9%-i sərf ediləcək. Həmin göstərici 2010-cu ildə 3,9%, 2011-ci ildə 3,9%, 2012-ci ildə 4,3%, 2013-cü ildə 3,7%, 2014-cü ildə 4,6%, 2015-ci ildə 5,1%, 2016-cı ildə isə 5,0% təşkil edib, bu göstəricinin cari ildə 4,8% olacağı gözlənilir. Xüsusi çəki göstəricisinin 2014-cü ildən sonrakı dövrlərdəki artımı ÜDM-in artım tempinin səngiməsi ilə bağlıdır.

    Ümumiyyətlə, hazırkı dövrdə pensiya xərclərinin ÜDM-də xüsusi çəkisi pensiya sisteminin fiskal dayanıqlılığının qiymətləndirilməsi üzrə beynəlxalq müqayisələrdə geniş istifadə edilən göstəricilərdən biridir. Beynəlxalq Valyuta Fondunun Fiskal işlər Departamenti tərəfindən “İnkişaf etmiş və inkişaf etməkdə olan iqtisadiyyatlarda dövlət pensiya islahatları üzrə çağırış” mövzusunda 2011-ci ildə hazırlanmış araşdırma sənədinə əsasən, həmin göstərici 1970-ci ildə orta hesabla 4,6% səviyyəsində (o cümlədən inkişaf etmiş iqtisadiyyatlarda 4,8%, inkişaf etməkdə olan iqtisadiyyatlarda 4,0%) olub, 2010-cu ildə isə müvafiq xüsusi çəki göstəricisi orta hesabla 7%-ə (o cümlədən inkişaf etmiş iqtisadiyyatlarda 8,4%, inkişaf etməkdə olan iqtisadiyyatlarda 5,6%) yüksəlib.

    Əmək pensiyalarının ödənişi xərcləri əhaliyə ödənişlər üzrə xərclərin 3 407 mln. manatını və ya 97,5%-ni təşkil edəcək ki, bu da 2016-cı ilin müvafiq icra göstəricisindən 364,16 mln. manat və ya 12,0%, 2017-ci ilin proqnoz göstəricisindən 193,18 mln. manat və ya 6%, gözlənilən icra göstəricisindən isə 109 mln. manat və ya 3,3% çoxdur. Başqa sözlə, əmək pensiyalarının ödənilməsi xərclərinin artım səviyyəsi Dövlət Sosial Müdafiə Fondunun ümumi xərclərinin artım səviyyəsini bir qədər üstələyəcək.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi