Azərbaycan gələn ilin büdcəsində xarici dövlətlərə kreditlər üçün 52 mln. manat proqnozlaşdırıb

Bakı. 1 oktyabr. REPORT.AZ/ 2017-ci ilin büdcəsində xarici dövlətlərə verilən kreditlər üçün 52 mln. manat vəsait proqnozlaşdırılıb. "Report"  2017-ci ilin dövlət və icmal büdcə layihələrinə istinadən xəbər verir ki, beynəlxalq fəaliyyət və beynəlxalq təşkilatlara üzvlük haqqı xərcləri üçün 237 mln. manat, o cümlədən diplomatik xidmət orqanlarının və konsulluqlarının saxlanılması, onların maddi-texniki təminatının yaxşılaşdırılması ilə bağlı xərclər üçün 110 mln. manat, beynəlxalq maliyyə-kredit təşkilatlarının səhm kapitalında iştirakı üçün 55 mln. manat beynəlxalq fəaliyyət və bu qəbildən olan digər tədbirlər üçün 20 mln. manat nəzərdə tutulub.

Bundan başqa, 2017-ci ildə beynəlxalq və ölkə səviyyəli tədbirlərin keçirilməsi ilə bağlı xərclər üçün 20 mln. manat proqnozlaşdırlır ki, həmin vəsaitin 8 mln. manatını Azərbaycanın xaricdəki diplomatik nümayəndəliklərinin və konsulluqlarının fəaliyyəti ilə bağlı xərclər, 12 mln. manatını isə beynəlxalq, ölkə səviyyəli və bu qəbildən olan tədbirlərin keçirilməsi ilə bağlı xərclər təşkil edəcək.