Azərbaycan Beynəlxalq Bankının reytinqlərinə yenidən baxıla bilər

Bakı. 24 may. REPORT.AZ/ “Azərbaycan Beynəlxalq Bankı” ASC-nin ötən gün Londonda (Böyük Britaniya) xarici kreditorlarla keçirdiyi görüş gözlənildiyindən də konstruktiv olub.

ABB-dən “Report”a verilən məlumata görə, bu barədə Bankın İdarə Heyəti sədrinin 1-ci müavini Abbas İbrahimov bildirib.

Onun sözlərinə görə, görüş barədə yayılmış press-relizdə də göstərildiyi kimi, bankın xarici kreditorlarına üç istiqamət üzrə təkliflər təqdim olunub. Xarici öhdəliklərin restrukturizasiyası prosesi plana uyğun şəkildə davam etdiriləcək.

Bu görüşdən sonra yaxın günlərdə hansı gözləntilərin olmasına gəlincə, A.İbrahimov qeyd edib ki, xarici ölkələrdə eyni prosesi keçmiş başqa bankların təcrübəsinə istinad edilsə, yaxın günlərdə ABB-nin reytinqlərinə yenidən baxılması gözləniləndir. “Ola bilər ki, beynəlxalq reytinq agentlikləri bankın reytinqlərini müvəqqəti aşağı salsınlar. Bunun bu günlərdə baş verməsi ehtimal edilir. Amma bu, bankın vəziyyətinin pisləşməsinə dəlalət etmir. Bundan əvvəl də qeyd etdiyimiz kimi, belə bir yanaşma agentliklər tərəfindən tətbiq edilən ənənəvi qaydadır. Bu, restrukturizasiya prosesində agentliklərin standartlarını və normal praktikasını əks etdirir. Restrukturizasiya prosesi keçən bankın reytinqləri aralıq mərhələdə bir qayda olaraq müvəqqəti aşağı salınır. Proses bitdikdən sonra isə yüksəlir”.

Onun sözlərinə görə, restrukturizasiya prosesi ABB-nin maliyyə mövqeyini gücləndirəcək və bankın reytinqləri əvvəlkindən də yüksək səviyyədə olacaq. “Azərbaycan dövləti hər zaman ABB-nin yanındadır və banka dəstəyini davam etdirir. Öhdəliklərin restrukturizasiyası planının elan olunması da bu bankın gələcəyinə doğru çox mühüm addımdır. Bu, kreditorlarımıza bizimlə birgə çalışmaq, ABB-nin uğurlarına, stabil inkişafına və dayanıqlılığına əmin olmaq üçün yol xəritəsi təqdim edir. Biz restrukturizasiya prosesinin uğurla başa çatacağına tam əminik. ABB bu proses nəticəsində əvvəlkindən də yüksək maliyyə mövqeyinə malik olacaq”, - deyə A.İbrahimov qeyd edib.

O, həmçinin bildirib ki, restrukturizasiya prosesində bank bütün əməliyyatları normal rejimdə davam etdirəcək. ABB öz müştərilərinə əvvəlki kimi yenə də tam və yüksək keyfiyyətlə xidmət göstərəcək.