Yuxarı
    Bağlamaq

    Avronun məzənnəsi tezliklə 0,98 dollara düşəcək

    FES rəhbərinin açıqlamaları dolları bir qədər də möhkəmləndirib

    Bakı. 18 noyabr. REPORT.AZ/ Dünən, noyabrın 17-də ABŞ Federal Ehtiyat Sisteminin (FES) rəhbəri Cannet Yellenin ABŞ Konqresində çıxışı dolların beynəlxalq valyuta bazarında bir qədər də möhkəmlənməsinə səbəb olub. "Report"un "Bloomberg" agentliyinə istinadən verdiyi xəbərə görə, C.Yellen FES-in noyabr iclasından sonra açıqlanan iqtisadi göstəricilərin ABŞ iqtisadiyyatında inkişafın sürətləndiyini və məşğulluğun ən yüksək həddə çatdığını göstərdiyini qeyd edib. Onun sözlərinə görə, maliyyə bazarları ABŞ seçkilərindən sonra iqtisadiyyatı stimullaşdırıcı vergi-fiskal tədbirlər zərfini gözləyir ki, bu sənədlər öz növbəsində inflyasiyanın artmasına səbəb olacaq.

    C.Yellen, həmçinin qeyd edib ki, ABŞ iqtisadiyyatında qeyri-müəyyən dövr hələ uzun müddət davam edəcək və FES diqqətlə Konqresin qərarlarını izləyəcək. O, noyabr iclasında FES-in mərhələli faiz artımı ilə bağlı qərarını dəstəklədiyini, ABŞ maliyyə sisteminin möhkəm, sağlam və təhlükəsiz olduğuna sevindiyini bildirib. FES rəhbəri ABŞ-ın məcmu borcunun ÜDM-də xüsusi çəkisinin artacağını proqnozlaşdıraraq, qanunvericilik orqanlarının daha çox məhsuldarlığın artırılmasına fikir verməli olduğunu deyib.

    Açıqlamalardan sonra əsas valyuta cütlüyü sayılan USD/EUR məzənnəsi 1,05 səviyyəsinə qədər geriləyib. Bununla da dollar avroyla müqayisədə noyabr ayında 3,6% möhkəmlənib. Hazırda USD/EUR məzənnəsi 1,0595 səviyyəsində yer alıb.

    "Report"un analitik qrupu avronun məzənnəsinin qısa müddət ərzində 0,98 USD/EUR-a qədər geriləyəcəyini ehtimal edir. Uzunmüddətli perspektivdə isə məzənnənin 0,80 USD/EUR səviyyəsinə çatması proqnozlaşdırılır. Bununla yanaşı, ABŞ-da uçot dərəcəsinin 2017-ci ildə daha sürətlə artırılacağı gözlənilir.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi