​ARDNF valyuta portfelində nominal dəyişikliklər edib

Bakı. 20 aprel. REPORT.AZ/ Azərbaycan Dövlət Neft Fondu (ARDNF) aktivlərin valyutalar üzrə strukturunda nominal dəyişiklik edib. "Report" xəbər verir ki, ARDNF-in portfelində olan aktivlərin müxtəlif valyutalarda nominal həcmi bu ilin əvvəlinə olan rəqəmlərlə müqayisədə aşağıdakı kimi dəyişib:

- ABŞ dollarında olan aktivlər 16,9 mln. dollar və ya 0,1% artıb, avroda olan aktivlər isə 135,7 mln. avro və ya 1,26% azalıb;

- İngilis funtunda olan aktivlər 21,5 mln. funt və ya 1,83% azalıb, Avstraliya dolları isə 12,2 mln. dollar və ya 4,62% artıb;

- Türk lirəsindəki aktivlər 35,9 mln. lirə və ya 3,23% artıb, Rusiya rublunda - 1 666,5 mln. rubl və ya 4,56% azalıb;

- Koreya vonunda olan aktivlərin nominal həcmi dəyişməz qalıb, Çin yuanındakı aktivlər isə 33,8 mln. yuan və ya 1,09% artıb;

- Yaponiya yenində olan aktivlər 1 457 mln. yen və ya 2,25%, digər valyutaların həcmi isə 22 mln. dollar və ya 5,5% artıb.

Qeyd edək ki, qızıl ehtiyatlarının həcmində nominal artım qeydə alınmayıb.

Ümumiyyətlə, ARDNF-in aktivləri 2016-cı ilin yanvar-mart aylarında 671,9 mln. dollar və ya 2% artıb. Artımın 230 mln. dollara yaxın hissəsi məzənnə dəyişikliyindən, 95 mln. dollara yaxın hissəsi aktivlərin idarə olunmasından, 347 mln. dollara yaxın vəsait isə neft və qaz satışından əldə edilib.