Bakı. 24 yanvar. REPORT.AZ/ Bakı Fond Birjasında yanvarın 27-də "Azərbaycan İpoteka Fondu" ASC-nin (AİF) 10 mln. manatlıq adlı, sənədsiz, faizli ipoteka istiqrazlarının yerləşdirilməsi üzrə hərrac keçiriləcək.
Fonddan “Report”a verilən məlumata görə, qiymətli kağızlar nominal dəyərlə satışa çıxarılacaq.
Xatırladaq ki, Maliyyə Bazarlarına Nəzarət Palatası noyabrın 21-də AİF-in 50 mln. manatlıq, bu gün isə 10 mln. manatlıq istiqraz emissiyasını qeydə alıb. Qiymətli kağızların nominal dəyəri 1 000 manat, illik gəlirliliyi isə 3% təşkil edir.
Emissiya prospektinə əsasən, yerləşdirmə kütləvi təklif üsulu ilə Bakı Fond Birjası vasitəsi ilə keçiriləcək. Depozitari və sərəncamçı xidmətlərini Milli Depozit Mərkəzi göstərəcək.