​ADB prezidenti: "Regiona güclü dəstəyimizi davam etdirəcəyik"

Bakı. 4 may. REPORT.AZ/ "Asiya İnkişaf Bankı (ADB) Azərbaycanla 15 ildir tərəfdaşlıq edir. Azərbaycanın gəlirləri artıb, yoxsulluq ciddi azalıb. Bu da Azərbaycanın davamlı inkişafa töhfəsidir". 

"Report" xəbər verir ki, bunu ADB-nin Bakıda keçirilən Direktorlar Şurasının toplantısında çıxış edən Bankın prezidenti Takehiko Nakao bildirib: "ADB-nin ümumi maliyyə dəstəyi 23 mlrd. dollara bərabərdir, öz vəsaitlərini isə 10 mlrd. dollara çatdırıb. Bu da son illər müşahidə olunan rekord rəqəmdir".

Bununla yanaşı o, ADB-nin keyfiyyətli təhsili təşviq etdiyini əlavə edib: "Azərbaycanda məktəbləri gözdən keçirərək millətin tərəqqisinə bələd ola bilərik".

ADB-nin başçısı qeyd edib ki, təşkilatın maliyyə qabiliyyəti 2017-ci ilədək 50%-ə çatdırılacaq: "Biz Asiya ve Sakit okean regionunun artım dərəcələrini qorumalıyıq, struktur islahatları həyata keçirməliyik. Biz regiona güclü dəstəyimizi davam etdirəcəyik".

"Ümumiyyətlə, regionda yoxsulluq azaldılmalıdır. Hazırda yer kürəsində 544 mln. insanın gündəlik qazancı 1,5 dollar təşkil edir. Biz nəzərə almalıyıq ki, istehlak səbəti ənənəvi qalır, ərzağın dəyəri artır. Əgər yeni yoxsulluq dərəcəsini qəbul etsək rəqəm daha da artar", - T.Nakao bildirib.

Bank prezindentinin sözlərinə görə, 2015-ci il beynəlxalq təşəbbüslərin həyata keçirilməsi ili olmalıdır. Bu ilin dekabr ayında Parisdə (Fransa) iqlim dəyişikliyi ilə bağlı keçiriləcək konfransda müxtəlif təşəbbüslər irəli sürüləcək.