Bakı. 19 yanvar. REPORT.AZ/ “Yapi Kredi Bank (Azerbaijan)” QSC-nin cəmi aktivləri bu il yanvarın 1-nə 427,291 mln. manat təşkil edib.
“Report” bankın maliyyə hesabatına istinadən xəbər verir ki, bu, ötən il yanvarın 1-i ilə müqayisədə 4,6% azdır.
“Yapi Kredi Bank (Azerbaijan)”ın aktivlərinin 102,974 mln. manatını müştərilərə verilmiş kreditlər təşkil edib. 2017-ci ildə bankın kredit portfeli 38,8% keçilib. Maliyyə qurumunun vaxtı keçmiş kreditləri isə 5,1% azalaraq 48,439 mln. manata düşüb.
Hesabat dövründə, “Yapi Kredi Bank (Azerbaijan)”ın cəmi öhdəlikləri 9,6% azalaraq 354,671 mln. manat, o cümlədən depozit portfeli 14,5% artaraq 329,82 mln. manat olub. Bankın cəmi kapitalı isə 30,4% artaraq 72,619 mln. manata çatıb.
2017-ci ildə “Yapi Kredi Bank (Azerbaijan)”ın faiz gəlirləri 34,69 mln. manat (2016-cı ilə nisbətən 4,5% çox), faiz xərcləri 7,993 mln. manat (36% az), qeyri-faiz gəlirləri 22,759 mln. manat (23,5% az), qeyri-faiz xərcləri isə 32,651 mln. manat (4,9% çox) təşkil edib. Son nəticədə bankın xalis əməliyyat mənfəəti 16,805 mln. manat olub ki, bu da illik müqayisədə 13% azdır.
Ötən il “Yapi Kredi Bank (Azerbaijan)” aktivlər üzrə mümkün zərərlərin ödənilməsi üçün xüsusi ehtiyatların yaradılmasına əvvəlki illə müqayisədə 83,8% az – 4,866 mln. manat vəsait ayırıb, 1,828 mln. manat isə mənfəət vergisi ödəyib. Bununla da, bank 2017-ci ili 10,11 mln. manat xalis mənfəətlə başa vurmuşdu. Halbuki, maliyyə qurumu 2016-cı ildən 10,328 mln. manat xalis zərərlə çıxmışdı.
Xatırladaq ki, "YapiKredi Bank Azerbaijan" 1998-ci ildə (əvvəlki "Koçbank (Azərbaycan)", 2007-ci ildə rebrendinq edilib) yaradılıb. Onun nizamnamə kapitalı 46 810 703,9 manatdır. Bu məbləğ hər birinin nominal qiyməti 0,02 manat olan 2 340 535 194 səhm əsasında formalaşıb. Səhmlərin 99,8%-i Türkiyənin "YapıKredi Bank"ına, 0,01%-i "YapıKredi Yatırım Menkul Değerler" şirkətinə, 0,01%-i isə "YapıKredi Finansal Kiralama" şirkətinə məxsusdur.