SOCAR istiqrazları ilə 24 mln. dollardan çox kredit verilib

Bakı. 1 iyun. REPORT.AZ/ Azərbaycan qiymətli kağızlar bazarında SOCAR istiqrazları ilə REPO əməliyyatlarının həcmi artıb.

“Report”a “SOCAR Capital” şirkətindən verilən məlumata görə, SOCAR istiqrazları ilə REPO müqavilələrinin 2018-ci il üzrə sayı 23-ə çatıb. Bu müqavilələr əsasında istiqraz sahibi olan həm hüquqi, həm fiziki şəxslərə aşağı faizlərlə 12 mln. dollardan çox kredit verilib. Nəticədə qeyd olunan qiymətli kağız vasitə ilə götürülən kreditin məbləği ümumilikdə 24 mln. dolları keçib.

Xatırladaq ki, SOCAR istiqrazları ilə REPO əməliyyatlarına 2017-ci ilin noyabr ayında başlanılıb və bu günə qədər 36 müqavilə bağlanılıb. Kreditlər əsasən 2 gündən 83 günə qədər illik 3,50-4,50 faiz arası götürülüb.

REPO əməliyyatı mexanizmi SOCAR istiqrazlarının sahiblərinə Bakı Fond Birjasında (BFB) istiqrazlarını girov qoyaraq qısamüddətli və sərfəli şərtlərlə kredit imkanı verir.

Qeyd edək ki, müxtəlif qiymətli kağızlar üzrə REPO məbləğləri fərqlənir. SOCAR istiqrazları etibarlı qiymətli kağız sayıldığına və BFB-nin əsas listinqində əməliyyat edildiyinə görə, bu kağızlar üzrə «hair cut» (təminat əmsalı) cəmi 5% təşkil edir. Yəni istiqraz sahibləri REPO əməliyyatları vasitəsilə sahib olduğu istiqrazların dəyərinin 95%-i həcmində vəsait cəlb edə bilər.

“REPO əməliyyatlarının istiqraz sahibləri üçün digər üstünlüyü pul vəsaitlərinin olduqca aşağı faizlərlə cəlb edilməsidir. Belə ki, illik 5% gəlirliyə malik olan SOCAR istiqrazlarının sahibləri çox aşağı faizlərlə kreditlər götürür, onların faiz gəlirləri isə heç bir halda azalmır.

REPO əməliyyatları qiymətli kağızlar bazarında aparılan əsas əməliyyatlardan və kağız sahibləri üçün yaradılan mühüm imkanlardan biri sayılır”,- məlumatda qeyd edilib.