Qlobal bazarlardan bu həftə 5 vacib iqtisadi xəbər gözlənilir

Qlobal bazarlardan bu həftə 5 vacib iqtisadi xəbər gözlənilir Əsas iqtisadi göstəricilərin ABŞ-da açıqlanması gözlənilir
Maliyyə
28 Avqust , 2017 12:20
Qlobal bazarlardan bu həftə 5 vacib iqtisadi xəbər gözlənilir

Bakı. 28 avqust. REPORT.AZ/ Bu həftə qlobal maliyyə bazarlarında 5 vacib iqtisadi xəbər gözlənilir. "Report"un məlumatına görə, sentyabr ayının 1-də ABŞ-da məşğulluq göstəricisi açıqlanacaq. Analitiklərin proqnozlarına görə, kənd təsərrüfatı sektoru istisna olmaqla, avqust ayında yeni iş yerlərinin sayının 183 min nəfər artması gözlənilir. Bununla yanaşı, sentyabrın 1-də açıqlanacaq işsizlik göstəricisinin iyul ayı səviyyəsində, yəni 4,3%-də qalması ehtimal edilir. Əsas diqqət isə ABŞ-da 1 saatlıq əmək haqqı məbləğinin artımına yönələcək. Analitiklər avqustda bu göstəricinin 0,2% artacağını proqnozlaşdırırlar. Qeyd edək ki, iyulda həmin göstərici 0,3% artıb. Avqust ayında əmək haqları proqnozları üstələyərsə, bu durumda FED-in il sonuna qədər faizləri artırması ehtimalları güclənər və bu, dolların möhkəmlənməsinə gətirib çıxarar.

Həftənin ikinci önəmli iqtisadi xəbəri ABŞ-da II rüb ÜDM-in son variantının açıqlanması olacaq. Göstəricinin ilkin variant olan 2,6%-i üstələməsi və 2,7% olması gözlənilir. Həmçinin, bu həftə ABŞ-da fiziki şəxslərin gəlir və xərcləri, şəxsi istehlak xərclərinin baza indeksi, istehsal sektorunda işgüzar fəallıq indeksi, istehlakçıların inam indeksi və avtomobil satışı göstəriciləri açıqlanacaq.

Avqustun 29-da avrozona iqtisadiyyatının avqust ayı üzrə inflyasiya göstəricisi açıqlanacaq. Göstəricinin 1,4% oması ehtimal edilir ki, bu da iyul ayında olan 1,3% artım göstəricisindən bir qədər çox, lakin hədəf 2%-dən aşağıdır.

Böyük Britaniyada sentyabrın 1-də istehsal sektorunun fəallıq hesabatı açıqlanacaq. Analitiklər bu göstəricinin cüzi azalaraq 55 bənd təşkil edəcəyini ehtimal edirlər.

Avqustun 31-də Çində istehsal sektorunun işğüzar fəallıq indeksi açıqlanacaq. Bu göstəricinin bir qədər azalaraq 51,3 bənd təşkil edəcəyi gözlənilir.

Son xəbərlər

Orphus sistemi