​“Qafqaz İnkişaf Bankı” nizamnamə kapitalını 13% artırır

Bakı. 10 sentyabr. REPORT.AZ/. Azərbaycan Qiymətli Kağızlar üzrə Dövlət Komitəsi tərəfindən "Qafqaz İnkişaf Bankı" ASC-nin kütləvi təklif üsulu ilə yerləşdiriləcək adi sənədsiz adlı səhmlərinin emissiyası qeydiyyata alınıb. "Report"un xəbər verdiyi kimi, bu barədə Komitənin məlumatında deyilir.

Emissiyanın ümumi həcmi 7 mln. manat, bir səhmin nominal dəyəri isə 1 manat təşkil edir.

Beləliklə, yerləşdirmədən sonra bankın nizamnamə kapitalı 12,7% artırılaraq 62 mln. manata çatdırılacaq. Yerləşdirmə Bakı Fond Birjasında həyata keçiriləcək.