“Moody's”: Azərbaycanda böyük banklar avroistiqraz emissiyasına başlaya bilər

Azərbaycanda maliyyələşdirmə sahəsində artan rəqabətin kiçik bankları beynəlxalq maliyyə institutlarından borclanmaları artırmağa sövq edir. 

 “Report”  bu barədə “Moody’s” beynəlxalq reytinq agentliyinin hesabatına istinadən xəbər verir.

“Böyük bankların avroistiqraz emissiyasına başlaması ehtimal olunsa da, bu, ümumi ikitərəfli maliyyələşdirmə həcmi ilə müqayisədə məhdud qalacaq”, -   “Moody’s” hesab edir.

Hesabata görə, MDB-yə üzv ölkələrin bankları uzunmüddətli sabit maliyyələşdirmə üçün getdikcə daha çox beynəlxalq kapital bazarlarına üz tutur, eyni zamanda, investorların da bu regiona marağı artır.

“Azərbaycan (Ba1, müsbət) və Ermənistanın (Ba3, sabit) bankları əsasən beynəlxalq maliyyə qurumlarından ikitərəfli maliyyələşməyə üstünlük verirlər”, -  hesabarda deyilir.

Agentlik qeyd edir ki, yeni emissiyalara baxmayaraq, bu tendensiyanın davam edəcəyi gözlənilir. Banklar üçün risklər topdansatış borclanmasının həcminin nisbətən kiçik olması səbəbindən məhdud qalsa da, onların dayanıqlılığı milli maliyyə institutlarının və tənzimləyici nəzarətin effektivliyindən asılı olacaq.

Hesabatda vurğulanır ki, MDB bankları hökumətlərin iqtisadi şaxələndirmə strategiyalarını maliyyələşdirmək üçün beynəlxalq bazarlara daha çox çıxış edirlər: “Artan iqtisadi aktivlik fonunda yerli bankların investisiya kreditləri vermək imkanları genişlənir. Bununla belə, təşkilata üzv ölkələrin əsasən qısamüddətli yerli maliyyələşdirmə modellərinə əsaslanması onların bazardakı iştirakını məhdudlaşdırır və uzunmüddətli maliyyələşdirmə axtarmağa sövq edir”.

“Moody’s” ekspertləri hesab edirlər ki, MDB ölkələrinin hökumətləri yerli iqtisadiyyatların maliyyələşdirilməsi ehtiyacını nəzərə alaraq bankların maliyyələşdirmə modellərinin təkmilləşdirilməsini dəstəkləyirlər. Bundan əlavə, hazırkı monetar və iqtisadi şərait MDB banklarının topdansatış borclanması üçün əlverişli sayılır. 

“Qlobal faiz dərəcələrinin azalması, yerli iqtisadi sabitliyin və valyuta dayanıqlığının yaxşılaşması fonunda MDB maliyyə institutları beynəlxalq borclanmalara marağı artırıblar. İqtisadi artım həmçinin xarici borclanmalar üçün risk mükafatlarını və maliyyələşdirmə xərclərini azaldır”, - hesabatda qeyd ediıir.