Dollar Türkiyədə tarixi rekordunu yeniləyib

Bakı. 12 yanvar. REPORT.AZ/ Türkiyədə ABŞ dollarının məzənnəsi tarixi rekord səviyyəyə yüksəlib. "Report"un "Bloomberg" agentliyinə istinadən verdiyi xəbərə görə, dünən axsam saatlarında məzənnə 3,9423 TRY/USD ilə ən maksimal həddə çatıb. Hazırda isə məzənnə 3,89 TRY/USD-yə kimi geriləyib. Geriləməyə səbəb kimi dolların dünya valyuta bazarında əsas valyutalarla müqayisədə ucuzlaşması olub. Belə ki, dünən, ABŞ-ın yeni prezidenti D.Trampın çıxışından sonra məzənnə 1,8% artaraq 1,0450 USD/EUR-dan 1,0640 USD/EUR-a çatıb. Qeyd edək ki, D.Tramp dünənki çıxışında ABŞ iqtisadiyyatının gələcəyi ilə bağlı planlarını açıqlamayıb.

"Report"un analitik qrupu bildirir ki, Türkiyədə dolların məzənnəsi yanvar ayının 24-də keçiriləcək Mərkəzi Bankın növbəti iclasına qədər sabit qalacaq. Əgər iclasda uçot dərəcəsinin artırılması ilə bağlı açıqlamalar verilərsə, dolların məzənnəsi 3,60 TRY/USD səviyyəsinə qədər enə bilər.