Bakı. 15 oktyabr. REPORT.AZ/ “Bank Avrasiya ASC-nin aktivləri illik müqayisədə 7,4% artaraq bu il oktybarın 1-nə 164765 min manata çatıb. Son 1 ildə "Bank Avrasiya"nın kredit portfeli 6,6% artaraq 92 547 min manat təşkil edib.
“Report” bu barədə Bankın maliyyə hesabatına istinadən xəbər verir.
Hesabat dövründə Bankın cəmi öhdəlikləri 15,4% artaraq 103 257 min manat, o cümlədən depozit portfeli 9,2% artaraq 53 697 min manat olub. Oktybarın 1-nə kredit təşkilatının nizamnamə kapitalı 50 mln. manat, cəmi kapital isə 61 508 min manat təşkil edib.
“Bank Avrasiya” yanvar-sentyabr aylarında 2 675 min manat mənfəət əldə edib. Bankın mənfəətində ötən ilin eyni dövrü ilə müqayisədə 4 dəfə azalma qeydə alınıb. Bu ilin ilk doqquz ayı ərzində "Bank Avrasiya"nın faiz gəlirləri 9 098 min manat, faiz xərcləri 2 067 min manat, qeyri-faiz gəlirləri 1 002 min manat, qeyri-faiz xərcləri 3 387 min manat təşkil edib.