"Bakı Fond Birjası" kapital artımını yekunlaşdırıb

“Bakı Fond Birjası” QSC (BFB) nizamnamə kapitalının 3,78 milyon manat (4 dəfə) artırılaraq 1,26 milyon manatdan 5,04 milyon manata çatdırılması prosesini yekunlaşdırıb.

"Report" bu barədə BFB-yə istinadən xəbər verir.

Məlumata görə, kapital artımı gözlənildiyi kimi, Birjanın dövriyyədə olan 6 300 səhminin nominal dəyərinin 200 manatdan 800 manata çatdırılması hesabına baş tutub. Səhmdar lazımi vəsaiti ötən illərin bölüşdürülməmiş mənfəəti hesabına təmin edib.

Xatırladaq ki, BFB 1997-ci ildə yaradılıb. Birjanın səhmdarları 20 hüquqi şəxsdir. Bunların arasında 7 yerli bank ("Azər-Türk Bank", “Azərbaycan Sənaye Bankı” (ASB), “Bank of Baku”, "Kapital Bank", "Azərbaycan Beynəlxalq Bankı", “Yapı Kredi Bank Azərbaycan” və ləğv prosesində olan "United Credit Bank" ASC-lər), 12 yerli və xarici investisiya şirkəti, hətta İstanbul Fond Birjası (“Borsa İstanbul”) var. ASB istisna olmaqla, digər səhmdarların BFB-də payı 4,76 %-dir. ASB isə Birjada 9,52 % payla təmsil olunur.