"AccessBank"ın dəstəyi ilə "UNEC Business Conversation Club" start götürüb

Bakı. 11 may. REPORT.AZ/ Bu gün UNEC-in "Maliyyə və mühasibat" fakültəsində "AccessBank"ın təşkilati dəstəyi ilə "UNEC Business Conversation Club"un ilk seminarı təşkil olunub.

"UNEC Business Conversation Club"da toplaşan tələbələr 5 həftə ərzində IELTS mütəxəssislərinin təqdimatı ilə ingilis dilinin biznes istiqamətini öyrənəcək.

Tədbiri giriş sözü ilə açan "Maliyyə və mühasibat" fakültəsinin dekanı Gəray Musayev UNEC ilə "AccessBank" arasında mövcud olan əməkdaşlığı yüksək qiymətləndirib: "Çox sevindirici haldır ki, "AccessBank" ilə reallaşdırdığımız layihələrin sayı durmadan artır. Əminəm ki, qarşıda bizi daha çox maraqlı layihələr gözləyir. O ki qaldı "UNEC Business Conversation Club"a, bu layihədə iştirak edən hər bir tələbə özünü bir neçə istiqamətdə inkişaf etdirə biləcək. Maliyyə sahəsi üzrə ali təhsil alan və gələcəkdə bu sektorda çalışacaq şəxslər üçün ingilis dili biliyi olduqca vacibdir".

Ardınca layihənin açılışında iştirak edən "AccessBank"ın İdarə Heyəti sədrinin müavini/Baş maliyyə inzibatçısı Albrext Sabelusa söz verilib. A.Sabelus qeyd edib ki, "AccessBank" bu layihəyə dəstək verməkdən çox məmnundur: "UNEC Azərbaycanın bank-maliyyə sektoruna bir çox peşəkar kadr bəxş edib. "AccessBank"ın komandasında da kifayət qədər UNEC məzunu var. İnanıram ki, bu layihə tələbələrin biliklərinə bilik qatacaq. İngilis dilinə yiyələnmək zamanın tələbidir. Xüsusilə maliyyə sektorunda ingilis dili biliklərinə yiyələnmək əsas şərtlərdən biridir. İqtisadi biliklərlə yanaşı, siz ingilis dilinə də yiyələnsəniz, necə deyərlər, artıq iş axtaran zaman bir deyil, iki addım öndə olacaqsınız. Bizim də məqsədimiz odur ki, bank-maliyyə sektoruna üz tutan gənclər kifayət qədər savadlı və peşəkar olsunlar".

"AccessBank"ın Korporativ Bankçılıq/Marketinq departamentinin direktoru Günay Cəlilova bildirib ki, təmsil etdiyi bankla UNEC arasında sıx əməkdaşlıq mövcuddur: "Təkcə bu ilin əvvəlindən bankın dəstəyi ilə UNEC-də bir neçə tədbir keçirilib və onların hamısı uğurlu olub. Bundan əvvəlki görüşlərimizdə də qeyd etmişdim ki, bu il bankımızın korporativ sosial məsuliyyət siyasətinin ana xətti təhsil üzərində qurulub. Biz bu layihəyə "AccessBank"da çalışan və beynəlxalq təcrübəyə malik olan mütəxəssisləri cəlb edəcəyik və onlar sizinlə öz bilik və təcrübələri ilə bölüşəcəklər".

G.Cəlilova əlavə edib ki, seminarı müvəffəqiyyətlə bitirən tələbələr bank tərəfindən mükafatlandırılacaq.

Daha sonra seminara start verilib.

Tədbirin yekununda təbdir iştirakçılarına bank adından hədiyyələr paylanılıb.