Azərbaycan millisinin baş məşqçisi: "Komandamda qorxu yox, Fransaya hörmət var"

Bakı. 1 fevral. REPORT.AZ/ “Komandada əhval-ruhiyyə yüksəkdir. Bu gün axşam rəqibin oyununun videoyazısına bir daha baxacağıq. Bundan sonra oyunçularıma meydanda nə edəcəklərini bir daha xatırladacağam. Əlbəttə, çox çətin, ağır oyun olacaq". 

"Report"un məlumatına görə, bunu futzal üzrə Azərbaycan milli komandasının baş məşqçisi Joze Alesio da Silva Sloveniyanın paytaxtı Lyublyanada Fransa yığması ilə keçirəcəkləri Avropa çempionatının qrup matçından əvvəl affa.az-a açıqlamasında deyib. 

Braziliyalı mütəxəssis Fransa millisinin qrupdakı ilk oyununda İspaniya ilə 4:4 hesablı heç-heçə etməsinə diqqət çəkib: "Sabahkı rəqibimiz bütün yarışların favoriti olan İspaniya kimi bir komandaya qarşı yaxşı oyun nümayiş etdirdi və yekunda xal qazandı. Onların Fransa futzal tarixinin ən yaxşı komandası olduqlarını bilirdik. Təsadüfi deyil ki, final mərhələsinə yüksəlmək üçün daimi iştirakçılardan olan Xorvatiyanı pley-off oyunlarında məğlub etdilər. İspaniyaya qarşı oyunlarını canlı izləsək də, təkrar baxıb, yekun heyətimizi də müəyyənləşdirəcəyik. Komandada qorxu yox, rəqibə hörmət var". 

Qələbə təqdirində 1/4 finala vəsiqəni təmin edəcəklərini deyən baş məşqçi Fransa ilə qarşılaşmanı finala bərabər saydığını vurğulayıb: "Qələbə qazana bilsək, növbəti mərhələyə yüksələcəyimiz dəqiqləşəcək. Bunu etmək üçün hər şeyə qadirik. Yaxşı hazırlıq keçmişik, taktiki tapşırıqlar üzərində məşqlər etmişik. Thaqo artıq bir həftədi məşqlərə qoşulub. Ancaq o, oyunlara 60 faiz hazırdır. Yüngül problemləri olsa da, oynayacaq, oynamalıdır. Çünki bu görüş bizim üçün final oyununa bərabərdir". 

Qeyd edək ki, fevralın 2-də keçiriləcək Azərbaycan - Fransa matçı Bakı vaxtı ilə saat 21:00-da başlanacaq.