Bakı. 16 may. REPORT.AZ/ Azərbaycanda 2015-ci ildə həcmi 236 kq təşkil edən barama istehsalı ötən il 71 tona çatıb.
"Report" xəbər verir ki, bunu jurnalistlərə kənd təsərrüfatı nazirinin müavini İlham Quliyev deyib: "Bu il isə istehsalın bundan bir neçə dəfə çox olacağını gözləyirik".
Nazir müavini bildirib ki, barama ailələrə 2 700 manat aylıq gəlir gətirəcək: "Gətirdiyimiz baramaları da kümçülərə paylamışıq. Respublikanın 31 rayonunda 739 kəndi əhatə edən 3 013 min kümçüyə vermişik. Bununla 3 013 ailənin dolanması təmin olunacaq. Orta hesabla bir ailə bir ayda 200-300 kq barama təhvil versə, bu, həmin ailənin ayda 1 800-2 700 manat qazancı deməkdir".
İ.Quliyevin sözlərinə görə, son günlər havaların yağışlı keçməsi və bəzi rayonlarda dolunun düşməsi kənd təsərrüfatına çox ziyan verməyib: "Kənd təsərrüfatına o qədər də ziyan dəyməyib. Əksinə, taxılçılıq, pambıqçılığa şərait yaradıb. Düzdür doludağıdan avadanlıqlar var. Amma bilirsiz ki, müharibə şəraiti ilə əlaqədar bu avadanlıqların həmin ərazilərdə quraşdırılmasında çətinliklər var".