Yuxarı

Astarada brusellyoz xəstəliyinə yoluxan heyvanlar zərərsizləşdirilib - FOTO

Astara rayonunda brusellyoz xəstəliyinə yoluxan iki baş iribuynuzlu heyvan zərərsizləşdirilib.

"Report"un Cənub bürosunun verdiyi xəbərə görə, hadisə rayonun Şüvü kənd sakini Şaban Məmmədova məxsus fermer təsərrüfatında qeydə alınıb. 

Onun sözlərinə görə, ötən ay Astara Rayon Baytarlıq İdarəsi tərəfindən təsərrüfatındakı 70-ə yaxın heyvandan qan nümunələri götürülüb. Nümunələr Qida Təhlükəsizliyi Agentliyinin Lənkəran Regional Sınaq Laboratoriyasında yoxlanıldıqdan sonra 2 baş iribuynuzlu heyvanda brusellyoz xəstəliyi aşkar olunub. Bu barədə təsərrüfat sahibi məlumatlandırılıb, hər iki heyvan kəsilərək baytarlıq-sanitariya tələblərinə uyğun şəkildə zərərsizləşdirilib və ərazidə dezinfeksiya işləri aparılıb. Ş.Məmmədov bununla da ona 3000 manata yaxın maddi ziyan dəydiyini bildirib. 

Qeyd edək ki, bundan əvvəl də ötən ilin avqust ayında onun təsərrüfatında 78 baş iribuynuzlu heyvan tələf olmuşdu. Ümumiyyətlə, ötən ay ərzində Astara Rayon Baytarlıq İdarəsi tərəfindən 1700 başa yaxın heyvandan götürülən qan nümunələri Qida Təhlükəsizliyi Agentliyinin Lənkəran Regional Sınaq Laboratoriyasında yoxlanılıb. Astarada 8000 baş heyvanın yoxlanılması nəzərdə tutulub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi