“Bir kəmər, bir yol”a rəqib olacaq plan hazırlanacaq

Avropa İttifaqı Avropanı dünyaya daha yaxından bağlayacaq yeni infrastruktur planı icra edəcək.

“Report” “Reuters”ə istinadən xəbər verir ki, Çin prezidenti Si Cinpin tərəfindən irəli sürülmüş və Asiya ilə Avropa arasında infrastruktur layihələri vasitəsilə xarici ölkələri təsir altına almağı hədəfləyən “Bir kəmər, bir yol” təşəbbüsünə qarşı Aİ də 2022-ci ildən iddialı planı tətbiq etmək qərarına gəlib.

“Biz Çinin dünyanın hər yerində siyasi nüfuzunu artırmaq üçün iqtisadi və maliyyə vasitələrindən istifadə etdiyini görürük. Bu barədə boş-boşuna səs salmaqdansa, alternativ təklif etməliyik. Avropa İttifaqının onları ABŞ-la yaxından əlaqələndirməsi çox mühümdür”, - Almaniyanın xarici işlər naziri Heyko Maas deyib.

Qeyd edək ki, “Globally Connected Europe” – “Dünya bağlantılı Avropa” adı verilən yeni strategiyada Çinin adı çəkilməsə də, layihənin hazırlanmasında iştirak etmiş bir diplomatın təbirincə desək, 8 səifəlik sənədin “hər yerində Çin yazılıb”.

2013-cü ildən irəli sürülmüş “Bir kəmər, bir yol” təşəbbüsü çərçivəsində Çin Cənub-Şərqi Asiya, Orta Şərqdə, Orta Asiyada, Avropa və Afrikadakı 60-dan çox ölkədə müxtəlif tikinti layihələri icra edib.

Daha əvvəl Aİ Avropa və Asiya arasında nəqliyyat, enerji, rəqəmli layihələrini əlaqələndirmək üçün Hindistan və Yaponiya ilə tərəfdaşlığa dair razılığa gəlib. Hər iki ölkə Çinin bu səxavəti nəticəsində kasıb ölkələrin böyük həcmdə borc götürərək Çindən asılı qalmalarından narahat olduqlarını bildiriblər.

Xatırladaq ki, iyunun 11-13-də keçirilmiş G7 zirvə görüşündə də infrastruktur tərəfdaşlığını genişləndirmək hədəfi ortaya qoyulmuşdu.