“Azərbaycan Xəzər Dəniz Gəmiçiliyi”nin sərnişin gəmisi neftçilərin istifadəsinə veriləcək

Bakı. 13 mart. REPORT.AZ/ “Azərbaycan Xəzər Dəniz Gəmiçiliyi” QSC-nin “MPK-460” sərnişin gəmisi Bibiheybət Gəmi Təmiri Zavodunda tərsanəyə qaldırılıb. 

Gəmiçilikdən "Report"a daxil olan məlumata görə, qısa vaxtda gəminin sükan-pər qurğusu açılıb, pərvanələr balanslaşdırılıb, lövbər və zəncirləri rənglənərək yerinə yığılıb. Hazırda gəminin gövdəsi pasdan təmizlənir. İşlərin yekununda isə uzunluğu 34 metr, eni 7 metr olan gəminin bütün sualtı hissəsi rənglənəcək.

Xəzər Dəniz Neft Donanmasında istismar edilən 66 sərnişin tutumuna malik gəminin maksimal sürəti 11-12 uzeldir. Neftçilərin və çox da ağır olmayan yüklərin Neft Daşları və platformalara daşınmasını həyata keçirən gəminin yaxşı manevr qabiliyyəti estakadaların arasında effektiv idarəsinə imkan verir.