ANAMA mükafat alıb

Minatəmizləmə Agentliyi (ANAMA) Dövlət Şəhərsalma və Arxitektura Komitəsinin BMT-nin Məskunlaşma Proqramı ilə birlikdə Bakıda keçirdiyi Ümumdünya Məskunlaşma Günü ilə bağlı forumda mükafatlandırılıb.

"Report" xəbər verir ki, "Xüsusi tanınma mükafatı" agentliyin İdarə Heyətinin sədr müavini Samir Poladova təqdim edilib.

Qeyd olunub ki, son 25 ildə ANAMA Azərbaycan ərazisində minaların təmizlənməsində ciddi işlər görüb.

S.Poladov bildirib ki, minatəmizləmə sahəsində agentliyin komandası 7 gün, 24 saat fəaliyyət göstərir: "Bu mükafat bizim komandanın çəkdiyi zəhmətin bəhrəsidir. Humanitar sahədə minalardan təmizlənmə çox vacib məqamdır. Təşəkkür edirəm ki, bu fəaliyyətimiz beynəlxalq səviyyədə tanındı. Mükafat ərazilərin minalardan təmizlənməsinin növbəti mərhələsində - gələcək addımlar üçün təkan rolu oynayır".