Bakı. 16 mart. REPORT.AZ/ Avropa İttifaqının (Aİ) məqsədi Bakı Beynəlxalq Dəniz Ticarət Limanını idarəetmə, informasiya-kommunikasiya texnologiyalarının tətbiqi, Azad Ticarət Zonasında insan resurslarının idarə edilməsi baxımından ən müasir və təhlükəsiz limana çevirməkdir.
"Report" xəbər verir ki, bunun “Ələtdə yerləşən yeni Bakı Limanı və Azad Ticarət Zonasının əməliyyat imkanlarının genişləndirilməsinə Aİ-nin dəstəyi” adlı layihənin açılış mərasimində Aİ-nın Azərbaycandakı nümayəndəliyinin rəhbəri, səfir Kestutis Yankauskas deyib.
"Enerji təhlükəsizliyi dialoqu ilə yanaşı nəqliyyat sahəsində də dialoqu həyata keçirmək, maliyyə yardımından başqa, texnologiyalarla bağlı təcrübəni də Azərbaycana gətirmək istəyirik. Bu layihə vasitəsilə Ələtdə infrastrukturun və onun idarə edilməsinin imkanlarını görəcəyik", - deyə o, qeyd edib.
Tədbirdə iştirak edən Gömrük Komitəsinin sədr müavini Şahin Bağırov isə deyib ki, təmsil etdiyi qurum Aİ ilə bir sıra layihələr həyata keçirir: "Bunlardan biri tranziy yüklərlə bağlı elektron sistemə keçilməsidir. Bu, Azərbaycana Avropa bazarlarına daxil olmağa imkan verəcək".