Akademik Milli Dram Teatrının kollektivi Şamaxıya qastrol səfərinə yollanacaq

Akademik Milli Dram Teatrının kollektivi Şamaxıya qastrol səfərinə yollanacaq Bakı. 17 noyabr. REPORT.AZ/ Akademik Milli Dram Teatrının kollektivi “Cəhənnəm sakinləri” tamaşası ilə Şamaxıya qastrol səfərinə yollanacaq.
İncəsənət
1055
17 Noyabr , 2018 12:34
Akademik Milli Dram Teatrının kollektivi Şamaxıya qastrol səfərinə yollanacaq

Bakı. 17 noyabr. REPORT.AZ/ Akademik Milli Dram Teatrının kollektivi “Cəhənnəm sakinləri” tamaşası ilə Şamaxıya qastrol səfərinə yollanacaq. 

Bu barədə "Report"a Teatrın Mətbuat xidmətindən məlumat verilib.

Məlumata görə, tamaşa noyabrın 20-də Şamaxı Mədəniyyət Mərkəzində nümayiş etdiriləcək.

Xalq yazıçısı Elçin Əfəndiyevin eyniadlı pyesi əsasında hazırlanan səhnə əsərinin müəllifi, quruluşçu rejissoru və rəssamı xalq artisti Azər Paşa Nemətov, rejissoru Anar Sadıqov, rejissor assistenti Dilbər İsmayılova, musiqi tərtibatçısı Kamil İsmayılovdur.

Tamaşada Azər Dadaşovun musiqisindən istifadə olunub.

Yeni səhnə əsərində xalq artistləri - Məleykə Əsədova (Qadın), Nurəddin Mehdixanlı (Qonaq), əməkdar artistlər - Elşən Rüstəmov (Kişi), Mirzə Ağabəyli (Qonşu), aktyorlar - Vüsal Mustafayev, Elçin Əfəndi, Ləman İmanova, Rüstəm Rüstəmov, Rada Nəsibova, Ramin Şıxəliyev, Xədicə Novruzlu iştirak edirlər.

Tamaşa 1937-ci ildə milli fəlakət və faciə şəklində bütün ölkəni əhatə edən repressiya hadisələrindən bəhs edir. İnsanlara qarşı həyata keçirilən kütləvi təqib, mənəvi təzyiq ər və arvadı üz-üzə qoyur, onlar böyük qorxunun əsarəti altında satqına çevrilirlər. Günahlarını bir-birindən gizlətməyə çalışsalar da, günlərin birində evlərində peyda olan çağırılmamış qonaq (ər-arvada görə Şeytan) onların əsl mahiyyətini üzə çıxarır, qorxunun insan həyatında hansı faciələrə səbəb olduğunu göstərir.

Qeyd edək ki, “Cəhənnəm sakinləri” tamaşası Akademik Milli Dram Teatrının repertuarında yer alan ən uğurlu tamaşalardan biridir. Mükəmməl rejissor quruluşu, mahir aktyor oyunu, özünəməxsus rəssam və bəstəkar işi ilə səhnə əsəri teatrsevərlər arasında böyük maraq yaradıb.

Son xəbərlər

Orphus sistemi