"AzScienceNet" çərçivəsində Azərbaycana verilən internetin həcmi 3 dəfə artıb

"Bu gün Azərbaycanın elmi tədqiqat müəssisələrinin cəmi 33 %-i "AzScienceNet" şəbəkəsinə qoşulub. Azərbaycan ali təhsil müəssisələrinin isə 42 %-i, yəni yarısından da az hissəsi həmin şəbəkənin xidmətlərindən istifadə edir".

"Report" xəbər verir ki, bunu Azərbaycan Milli Elmlər Akademiyasının (AMEA) vitse-prezidenti, akademik Rasim Əliquliyev Bakıda keçirilən 5-ci Şərq Tərəfdaşlığı E-infrastrukturlar Konfransının (The 5th Eastern Partnership E-infrastructures Conference – “EaPEC 2022”) açılış mərasimində bildirib.

R.Əliquliyev əlavə edib ki, "AzScienceNet" layihəsi çərçivəsində Azərbaycana verilən internetin həcmi 3 dəfə artıb:

"2015-ci ildə Avropa Komissiyası 6 ölkədə internet infrastrukturunu inkişaf etdirmək üçün 13,8 milyon avro dəyəri olan "EaP Connection" şəbəkəsini yaratdı. Vəsaitin 95 %-ni Avropa Komissiyası, 5 %-ni isə üzv ölkələr ayırdılar. Bizim "AzScienceNet" şəbəkəmiz də bu layihəyə qoşuldu.

Əgər ilk əvvəllər 1 GB/s sürətlə internet verilirdisə, indi bu rəqəm 3 GB/s-a qədər artırılıb. Amma bu da məhdudiyyət demək deyil. Biz nə qədər istəsək onlar o qədər sürət təmin edə bilərlər. Bu sürətin üçdə birini AMEA-nın köhnə strukturunda olan institutlar, qalan hissəsini isə Elm və Təhsil Nazirliyinin strukturları istifadə ediblər. Bu şəbəkədən isə dünya üzrə 50 milyondan çox elm və təhsil ictimaiyyətinin nümayəndələri istifadə edir".