Prezident İlham Əliyev Azərbaycanın qadın voleybolçularının Avropa çempionatındakı sonuncu oyununa baxıb - YENİLƏNİB

Bakı. 1 oktyabr. REPORT.AZ/ Oktyabrın 1-də qadın voleybolçular arasında Avropa çempionatında üçüncü yer uğrunda görüş keçirilib.

"Report" xəbər verir ki, çempionatın bürünc medalları uğrunda Milli Gimnastika Arenasında Azərbaycan və Türkiyə yığma komandaları qarşılaşıblar.

Azərbaycan Respublikasının Prezidenti İlham Əliyev komandamızın oyununa baxıb.

Maraqlı idman mübarizəsi şəraitində keçən matçın birinci setində üstün oyun nümayiş etdirən Azərbaycan millisi 25:22 hesabı ilə qalib gəlib. Komandaların böyük əzmkarlıq göstərdikləri ikinci setdə Türkiyə voleybolçuları 21:25 hesabı ilə üstün olublar. Beləliklə, ümumi hesab bərabərləşib – 1:1. Qarşılaşmanın üçüncü seti təşəbbüsə yiyələnən Türkiyə voleybolçularının üstünlüyü ilə başa çatıb – 14:25. Dördüncü setdə də qalib gələn (8:25) Türkiyə millisi ümumi hesabda qələbə qazanıb - 3:1. Beləliklə, Türkiyə voleybolçuları Avropa çempionatının bürünc medallarına sahib olublar.

Azərbaycan milli komandası çempionatı dördüncü sırada başa vurub.

Xatırladaq ki, Azərbaycanın qadın voleybolçuları Avropa çempionatlarında ən yaxşı nəticəni 2005-ci ildə Xorvatiyada keçirilən qitə birinciliyində göstəriblər. Həmin vaxt millimiz Avropa çempionatlarında ilk dəfə iştirak etməsinə baxmayaraq, dördüncü yeri tutub. Azərbaycanın qadın voleybolçuları həmin çempionatdan başlayaraq, sonrakı qitə birinciliklərinin final mərhələlərində çıxış ediblər.

***16:21

Qadın voleybolçular arasında Avropa çempionatında bürünc medal uğrunda görüş keçirilir.

"Report" xəbər verir ki, çempionatda bürünc medal uğrunda görüşdə Azərbaycan və Türkiyə yığmaları qarşılaşırlar.

Azərbaycan Respublikasının Prezidenti İlham Əliyev voleybolçularımızın oyununa baxır.

Qızıl medal uğrunda görüşdə isə Serbiya və Niderland milliləri üz-üzə gələcəklər.