Yuxarı

Azərbaycan Futzal Federasiyasının prezidenti: "Avropa çempionatında minimum tapşırıq növbəti mərhələyə yüksəlməkdir" - MÜSAHİBƏ

Azərbaycan Futzal Federasiyasının prezidenti: "Avropa çempionatında minimum tapşırıq növbəti mərhələyə yüksəlməkdir" - MÜSAHİBƏ
Bunun üçün Fransa ilə oyunda qələbə qazanmalıyıq

Bakı. 2 fevral. REPORT.AZ/ AFFA-nın İcraiyyə Komitəsinin üzvü, Azərbaycan Futzal Federasiyasının prezidenti Zaur Axundov affa.az saytının suallarını cavablandırıb. 

"Report" həmin müsahibəni təqdim edir.

- Futzal üzrə Azərbaycan millisi yanvarın 10-dan 27-dək Bakıda təlim-məşq toplanışı keçirib, yanvarın 28-dən isə hazırlığı Avropa çempionatının final mərhələsinə ev sahibliyi edən Sloveniyanın Lyublyana şəhərində davam etdirir. Bu gün Fransa yığması ilə keçirəcəyi ilk oyundan əvvəl komandada vəziyyət necədir?

- Əhval-ruhiyyə yaxşıdır. Məşqlər plan üzrə keçirilir. Bakıda məşqlərdə zədəli olduğuna görə, Thaqo kollektiv çalışmalarda iştirak edə bilmədi. Ancaq o, son bir həftədə komandaya qoşuldu və oyunöncəsi keçirilən məşqdə fəal iştirak etdi. Komandanın Fransa ilə oyuna tam hazır olduğunu deyə bilərəm.

- Baş məşqçi ilə komanda barədə söhbətiniz olub?

- Joze Alesio da Silva ilə hər gün söhbət edirik. O, sərəncamında olan oyunçuları çox yaxşı tanıyır. AFFA rəhbərliyi də komandanın yaxşı hazırlıq və yoldaşlıq oyunları keçirməsi üçün hər cür şərait yaratdı. Baş məşqçi bu imkandan maksimum istifadə edib və komandanı çempionata yaxşı hazırlayıb.

- Oyundan əvvəl sizi narahat edən məqam var?

- Rəqibin kimliyindən asılı olmayaraq, hər oyundan əvvəl narahatlıq keçirirəm. İspaniya – Fransa qarşılaşmasını izlədikdən sonra isə narahatlığım bir qədər də artıb. Fransa gözləmədiyimiz oyunu nümayiş etdirdi. Deyərdim ki, həmin oyunda İspaniya 1 xal qazandı, Fransa isə 2 xal itirdi. Artıq Avropada zəif komanda, rəqib anlayışı yoxdur. Fransa Xorvatiya kimi komandanı məğlub edib həlledici mərhələyə qatılıbsa, deməli güclü rəqibdir. Onlar İspaniya ilə oyunda bunu bir daha təsdiqlədilər.

- İzlədiyiniz Fransa millisinin əsas üstünlüyü, təhlükəli cəhətləri hansılardır?

- Onlar meydana istəkli çıxmışdılar, sona qədər də əzmkarlıq göstərdilər. Komandadakı ruh yüksəkliyi onları oyuna yaxşı kökləmişdi. Nəticədə dünya və Avropa çempionu olan İspaniya meydanda aciz görünürdü. Təbii ki, güclü rəqiblə oyunda qazanılan 1 xal onlara əlavə ruh yüksəkliyi verib. Çalışacaqlar bizimlə qarşılaşmada da qələbə qazansınlar və özləri üçün yeni tarix yazsınlar. Ona görə də Fransa ilə oyun bizim üçün çempionatın final matçına bərabərdir.

- Fransanın çempionata Azərbaycan millisindən əvvəl start verməsinin müsbət və mənfi məqamları hansılardır?

- Onlar artıq meydana alışıblar, ilkin həyəcanı yaşayıblar, xal hesabını açıblar. Bizim üçün müsbət məqamı odur ki, oyunçularımız bir gün artıq istirahət ediblər. Ümumiyyətlə, Fransanın İspaniya kimi favorit komandadan xal alacağını heç kim gözləmirdi. Ancaq futbolda belə sürprizlər də yaşanır. Onlarla oyunda bizi ancaq qələbə qane edəcək. Heç-heçə də komandamıza sərf etmir.

- İspaniya – Fransa oyunundan sonra azarkeşlərdə də bir ruh düşkünlüyü yaranıb. Sanki rəqib bu nəticə ilə onları qorxudub. Oyunçularda necə, bu, hiss olunur?

- İndiyə qədər heç vaxt rəqibimizdən qorxmamışıq, ancaq hörmətlə yanaşmışıq. İspaniya, İtaliya, Rusiya kimi daha güclü rəqiblərlə də qarşılaşmışıq, ancaq meydana qorxu altında çıxmamışıq, sona qədər mübarizə aparmışıq. Bəlkə də İspaniya Fransa ilə oyuna arxayın çıxmışdı və yekunda bunun acısını dadı.

- Hazırkı çempionat sürprizlərlə başlayıb. Arxada qalan oyunlarla bağlı nə deyə bilərsiniz?

- Rusiya – Polşa oyununda da sürpriz nəticə qeydə alındı. Əksər mütəxəssislər Rusiya yığmasını favorit görür və onların asan qələbə qazanacağını düşünürdülər. Ancaq Polşa sona 9 saniyə qalmış hesabı bərabərləşdirdi. Sürprizlər qeydə alınmağa başlayıb, amma indi bizi yalnız Fransa ilə oyun düşündürür. Heç-heçə bizim üçün məğlubiyyətə bərabərdir. Ancaq qələbə qazanacağımız təqdirdə komandadan razı qala bilərəm.

- Qarşıya qoyulan məqsəd dəyişməyib?

- Qətiyyən. Minimum tapşırıq növbəti mərhələyə yüksəlməkdir. Bunun üçün də Fransa ilə oyunda qələbə qazanmalıyıq. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi