Yuxarı

“Araz” UEFA Kubokunun əsas mərhələsində həlledici oyununu keçirəcək

“Araz” UEFA Kubokunun əsas mərhələsində həlledici oyununu keçirəcək
Naxçıvan təmsilçisi Rumıniyanın Deva komandası ilə qarşılaşacaq

Bakı. 14 oktyabr. REPORT.AZ/ Bu gün Azərbaycanın “Araz” futzal komandası UEFA Kubokunun əsas mərhələsində həlledici oyununu keçirəcək. 

“Report” xəbər verir ki, Naxçıvan təmsilçisi Rumıniyada təşkil olunan VIII qrupun sonuncu - 3-cü turunda meydan sahibi “Deva” ilə qarşılaşacaq.

İlk matçda Bosniya və Herseqovina çempionu “Mostar”ı 5:2, ikinci görüşdə Maltanın “Sent Endryus” komandasını 6:4 hesabı ilə məğlub edən “Araz” hazırda qrup lideridir. Joze Alesionun rəhbərlik etdiyi kollektiv elit-raunda vəsiqə qazanmaq üçün mövqeyini qorumalıdır.

Üç xalla ikinci sırada yer alan “Deva” ilə qarşılaşmada heç-heçə də Azərbaycan çempionuna mübarizəni davam etdirmək üçün yetərlidir. Yalnız rumınlara böyük hesablı məğlubiyyət vəziyyəti dəyişə bilər. Meydan sahibləri ilə oyunda “Araz”a 2 top fərqi ilə uduzmaq da sərf edə bilər. Çünki “Mostar” qələbə qazanacağı təqdirdə, hər üç komandanın 6 xalı olacaq. Şəxsi oyunlara gəldikdə, “Araz” bosniyalıları 3 top fərqi ilə məğlub edib, “Deva” isə onlara 1 top fərqi ilə uduzub.

“Mostar” qələbə qazana bilməsə, “Araz” istənilən halda uduzmamalıdır. Çünki iki komandanın xalı eyni olduqda, şəxsi görüşlərə üstünlük verilir. “Deva” qalib gələrsə, turnir cədvəlində “Araz”ı qabaqlayacaq.

Futzal üzrə UEFA Kuboku

Əsas mərhələ, B yolu

VIII qrup, III tur

14 oktyabr

20:00. “Araz” (Azərbaycan) – “Deva” (Rumıniya)

Deva. İdman Sarayı

Xal durumu: “Araz” – 6, “Deva”, “Mostar” – 3, “Sent Endryus” – 0.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi