Bakıda olimpiadaya lisenziya xarakterli yarışda 33 ölkənin gimnastları iştirak edəcək

Bakı. 18 may. REPORT.AZ/ Yeniyetmələrin III Yay Olimpiya Oyunlarına idman gimnastikası üzrə təsnifat yarışı üçün Bakıya gələcək ölkələrin sayı bəlli olub.

Azərbaycan Gimnastika Federasiyasından “Report”a verilən məlumata görə, iyunun 23-də Milli Gimnastika Arenasında start götürəcək lisenziya xarakterli turnirə 33 ölkədən 58 kişi və 54 qadın idman gimnastı qatılacaq.

Kişi gimnastları 16 - 17, qadın gimnastlar isə 15 yaşlılar kateqoriyasında mübarizə aparacaqlar. Azərbaycanı yarışda Səməd Məmmədli, Ağamurad Qəhrəmanov və Samirə Qəhrəmanova təmsil edəcək.

Təsnifat yarışlarında çoxnövçülük proqramındakı çıxışların nəticələrinə əsasən, hər ölkədən yalnız bir nəfər olmaqla, ilk “17-lik”də yer almış iştirakçılar olimpiadaya getmək şansı əldə edəcəklər.

Qeyd edək ki, III Yay Olimpiya Oyunları bu il 6 – 18 oktyabrda Argentinanın paytaxtı Buenos-Ayresdə təşkil olunacaq.