Yuxarı

Azərbaycanın nümayəndə heyəti XXIII Qış Olimpiya Oyunlarının bağlanış mərasimində iştirak etməyəcək

Azərbaycanın bayrağını könüllü daşıyacaq

Bakı. 25 fevral. REPORT.AZ/ Bu gün Cənubi Koreyanın Pxençxan şəhərində keçirilən XXIII Qış Olimpiya Oyunlarının bağlanış mərasimində Azərbaycanın bayrağını könüllü daşıyacaq.

Bunu “Report” Azərbaycanın şef de-missionu Anar Bağırov deyib.

O bildirib ki, bu gün Bakıya yola düşdükləri üçün Azərbaycan nümayəndə heyəti bağlanış mərasimində iştirak etməyəcək.

Keçid zamanı Azərbaycanla yanaşı, Livan, Lixtenşteyn, Keniya, Sinqapur, Özbəkistan, İran, Hindistan, Makedoniya, Macarıstan və Honkonqun da bayraqlarını könüllülər aparacaqlar.

Buna səbəb Azərbaycan kimi, adları qeyd olunan ölkələrin də nümayəndə heyətlərinin artıq Cənubi Koreyanı tərk etmələridir.

Bağlanış mərasimində Rusiya idmançılarının çıxış etdikləri Beynəlxalq Olimpiya Komitəsinin bayrağını da könüllü tutacaq.

Bağlanış mərasimi Bakı vaxtı ilə saat 15:00-da start götürəcək. Açılışda Azərbaycanın bayraqdarı Oyunlarda ölkənin yeganə təmsilçisi olan xizəksürən Patrik Braxner idi. O, çıxış etdiyi slalom yarışında yıxıldığı üçün finiş xəttinə çata bilməyib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi