Bakı. 17 avqust. REPORT.AZ/ Azərbaycanı 2016-cı il Rio-de-Janeyro Yay Olimpiya Oyunlarında təmsil edən qadın güləşçi Yuliya Ratkeviç yarımfinal görüşünə çıxıb.
"Report"un məlumatına görə, 58 kq çəki dərəcəsində yer alan belaruslu legionerin rəqibi yaponiyalı 3 qat olimpiya və 10 qat dünya çempionu Kaori İço olub.
Görüş İçonun təmiz qələbəsi ilə yekunlaşıb - 10:0.
Beləliklə, finala yüksələ bilməyən Ratkeviç bürünc medal uğrunda təsəlliverici görüşdə iştirak edəcək.
*** 19:38
Azərbaycanı 2016-cı il Rio-de-Janeyro Yay Olimpiya Oyunlarında təmsil edən qadın güləşçi Yuliya Ratkeviç yarımfinala yüksəlib.
"Report"un məlumatına görə, 58 kq çəki dərəcəsində yer alan belaruslu legioner 1/4 finalda kolumbiyalı Jaklin Renteria Kastilyonu məğlubiyyətə uğradıb - 7:3.
*** 18:24
Azərbaycanı 2016-cı il Rio-de-Janeyro Yay Olimpiya Oyunlarında təmsil edən qadın güləşçi Yuliya Ratkeviç ilk görüşünə çıxıb.
"Report"un məlumatına görə, 1/8 finala təsadüf edən qarşılaşmada rəqib ukraynalı Oksana Herhel olub.
Ratkeviç görüşün sonlarınadək 3:0 hesabı ilə öndə olsa da, rəqibi ardıcıl xallarla irəli çıxıb. Bununla belə, son saniyələrdə azərbaycanlı güləşçi daha bir fənd tətbiq edərək qələbəni təmin edib - 7:5.
1/4 finalda onun rəqibi kolumbiyalı Jaklin Renteria Kastilyo olacaq.