Bakı. 13 iyun. REPORT.AZ/ Beynəlxalq Velosipedçilər İttifaqının 2.2 kateqoriyalı Slovakiya Turu Azərbaycanın "Synergy Baku" kontinental komandası üçün uğurlu sonluqla başa çatıb. Azərbaycan Velosiped İdmanı Federasiyasından "Report"a verilən məlumata görə, Kiril Pozdnyakov ümumi sıralanmada fəxri kürsünün 3-cü pilləsinə qalxıb.
Yarışın 2-ci mərhələsində finiş xəttini 2-ci keçməklə ümumi təsnifatda 3-cü pilləyə yüksələn K.Pozdnyakov bu mövqeyini sonadək qoruyub.
Beşgünlük yarışın qalibi, İtaliyanın "Unieuro Wilier" komandasının üzvü Mauro Finetto olub. Azərbaycan idmançısı liderdən cəmi 9 saniyə geri qalıb.
Qeyd edək ki, 23 komandanın çıxış etdiyi yarışda "Synergy Baku" Maksim Averin, Elçin Əsədov, Samir Cəbrayılov, Aleksandr Surutkoviç və Kiril Pozdnyakovla təmsil olunub.