Yuxarı

​İqtisadiyyat və sənaye naziri Qubada vətəndaşlarla görüşüb

Nazir tərəfindən indiyədək bölgələrdə 32 vətəndaş qəbulu keçirilib, qəbullarda 1 800-dən çox vətəndaş müraciət edib

Bakı. 29 avqust.REPORT.AZ/ İqtisadiyyat və sənaye naziri Şahin Mustafayev Qubada Qusar, Xaçmaz və Quba rayonlarından olan vətəndaşları qəbul edib.

"Report"un nazirliyə istinadən xəbər verir ki, qəbulda nazir Şahin Mustafayev 50-dən çox vətəndaşın müraciətlərini dinləyib, müraciətlərdə qaldırılan məsələlərin bir hissəsi yerindəcə öz həllini tapıb, digər müraciətlər üzrə qaldırılan məsələlərin həlli üçün konkret tapşırıqlar verilib.

İqtisadiyyat və Sənaye Nazirliyinin fəaliyyətinə aid olmayan digər məsələlərlə bağlı müraciətlər isə aidiyyəti strukturlara çatdırılması üçün qeydiyyata alınıb.

Ümumilikdə, qəbula gələn vətəndaşlar sahibkarlıq fəaliyyəti, güzəştli kreditlərin verilməsi, istehsal sahələrinin yaradılması, haqsız rəqabətin aradan qaldırılması, əkin sahələrinin suvarılması, sosial və s. məsələlərlə bağlı müraciət ediblər.

Qəbula gələn sahibkarların təklifləri müzakirə edilmiş, balıqçılığın, turizm infrastrukturunun, bağçılığın inkişafı, heyvandarlıq kompleksinin yaradılması, tikinti materiallarının istehsalı və s. sahələr üzrə investisiya layihələrinin maliyyələşdirilməsi barədə müvafiq göstərişlər verilib.

Qeyd edək ki, Qubada keçiriləcək vətəndaş qəbulu barədə əvvəlcədən KİV-də müvafiq məlumat verilib və qəbula yazılmaq üçün əlaqə vasitələri göstərilib.

İqtisadiyyat və Sənaye naziri Şahin Mustafayev tərəfindən indiyədək Qubada təşkil olunmuş qəbul da daxil olmaqla, bölgələrdə 32 vətəndaş qəbulu keçirilib, qəbullarda 1800-dən çox vətəndaş müraciət edib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi