Ukrayna və Azərbaycan tranzit əlaqələrini genişləndirir

Bakı. 29 iyul. REPORT.AZ/ Ukrayna və Azərbaycan Ələt limanının bərə infrastrukturundan istifadə etməklə, qarşılıqlı daşımaları inkişaf etdirmək niyyətlərini təsdiq edib.

"Report"un Ukrayna mətbuatına istinadən verdiyi məlumata görə, bu qərar Kiyevdə keçirilən beynəlxalq avtomobil əlaqəsi üzrə Ukrayna-Azərbaycan qarışıq komissiyasının iclasında verilib. Komissiyanın qərarına əsasən, bərə əlaqəsindən Azərbaycan ərazisindən keçməklə, Ukraynaya daxil olan yüklərin daşımasının həyata keçirilməsi planlaşdırılır. Bu məqsədlə tərəflər Azərbaycan ərazisindən (tranzit) hərəkət edən avtomobil daşıyıcıları üçün icazələrin yeni formasının tətbiq edilməsi məsələsi üzərində işləyirlər.

Bundan başqa, Azərbaycan tərəfi cari ildə ukraynalı avtomobil daşıyıcıları üçün icazələrin kvotasını (+0,3 min və ya +14%) artırmaq barədə qərarı təsdiq edib.

Görüş iştirakçıları bildiriblər ki, qeyd edilən icazələr Azərbaycanla Ukrayna arasında yüklərin daşımasının inkişafı üçün strateji əhəmiyyətə malikdir.