Yuxarı

Nazir müavini: "Azərbaycanda əsas problem 2-3 ulduzlu hotellərin az olmasıdır"

2-3 ulduzlu hotellərin tikilməsinə indiyə kimi iri holdinq və ya sahibkarlar maraq göstərməyiblər

Bakı. 30 mart. REPORT.AZ/ "Nazirliyin hansısa şirkət, hotel və ya restoranın qiymətinin aşağı salınması ilə bağlı səlahiyyəti yoxdur. Çünki Azərbaycanda bu sahədə sərbəst bazar şəraiti mövcuddur. Qiyməti yuxarı olan restorana gələn müştəri ikinci dəfə ora üz tutmaz. Bu da təbii ki, biznes itirməsi deməkdir. Yəni biznesi itirən restoran və ya hotel qiymətlərin yuxarı olmasını düşünməlidir". "Report"un məlumatına görə, bunu mədəniyyət və turizm nazirinin müavini Nazim Səmədov jurnalistlərə açıqlamasında deyib.

Xarici valyuta ilə hesablayarkən Azərbaycanda qiymətlərin daha cəlbedici olduğunu deyən nazir müavini bildirib ki, Novruz bayramından əvvəl Gürcüstanda olan qiymətlərlə Azərbaycan hotellərində olan qiymətləri müqayisə etdikdə 5 ulduzlu seqment üzrə Bakıda olan brend hotellərin 3-4 dəfə, 4 ulduzlu seqment üzrə 2 dəfə ucuz olduğu məlum olur: "Azərbaycanda bu sahədə əsas problem 2-3 ulduzlu hotellərin az olmasıdır".

O qeyd edib ki, bu gün az ulduzlu hotellər üçün təklif çox zəifdir: "Çünki 2-3 ulduzlu hotellərin tikilməsinə indiyə kimi iri holdinq və ya sahibkarlar böyük maraq göstərməyiblər. Səbəb isə bu işin onlara o qədər də cəlbedici görünməməsidir. Halbuki 2-3 ulduzlu hotelə qoyulan investisiya daha tez geri qayıdır. Ona görə bu sahədə işləri daha da gücləndirmək lazımdır".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi