Bakı. 30 iyun. REPORT.AZ/ Azərbaycan vətəndaşları tikinti şirkətlərindən mənzil almazdan öncə onun satılıb-satılmadığını, mülkiyyətçisinin olub-olmadığını öyrənə biləcəklər.
"Report" xəbər verir ki, bu barədə Əmlak Məsələləri Dövlət Komitəsi (ƏMDK) yanında Daşınmaz Əmlakın Dövlət Reyestri Xidmətinin (DƏDRX) rəisi Hikmət Mustafayev məlumat verib.
Onun sözlərinə görə, bu, ƏMDK-nin istifadəyə verməyə hazırlaşdığı yeni elektron xidmətin sayəsində mümkün olacaq.
"Bundan başqa, Komitə müxtəlif ünvanlarda yerləşən mənzillərin neçəyə satılması ilə bağlı da vətəndaşları məlumatlandıracaq. Bu da bizim istifadəyə verilmək üzrə olan digər elektron xidmətimiz sayəsində mümkün olacaq. İnsanlar hansı mənzilin sonuncu dəfə nə vaxt, neçəyə satıldığını öyrənəcəklər", - deyə H.Mustafayev qeyd edib.