Yuxarı
    Bağlamaq

    Cavid Qurbanov: “Məqsədimiz yeni loqistik dəhliz yaratmaqdır”

    Bizim təklif etdiyimiz yeni dəhliz Avropaya çıxış baxımından da sərfəlidir© Report.az

    Tbilisi. 6 iyun. REPORT.AZ/ “Azərbaycan, Gürcüstan, İran, Ukrayna və Polşanın iştirakı ilə Cənub və Qərb arasında yeni loqistik dəhliz yaradıla bilər. Bunun üçün artıq danışıqlar gedir və ilkin addımlar atılıb”.

    Bu sözləri “Report”un Gürcüstan bürosuna müsahibəsində “Azərbaycan Dəmir Yolları” QSC-nin sədri, millət vəkili Cavid Qurbanov söyləyib.

    C.Qurbanov deyib ki, Polşanın daxilində, Slavkov deyilən ərazidə bizim ölçülərə uyğun, yəni 1520 ölçüdə 400 kilometr uzunluqda dəmir yolu xətti var. Bu da Avropa ölkələrindən yüklərin Azərbaycandan keçməklə Hindistan, Pakistan, İran və digər ölkələrə daşınmasında mühüm rol oynaya bilər. İlkin hesablamalara görə, bu yolun üzərində 72 milyon tona yaxın yük var. Biz bunun bir hissəsini götürə bilərik. Pul vahidi ilə ifadə etsək, Hindistan ilə Polşa arasındakı dövriyyə təqribən 3 milyard dollara yaxındır. İran ilə Ukrayna arasında isə təqribən 500-600 milyon dollar civarındadır.

    Millət vəkili bildirib ki, bu vaxtadək sözügedən məsələ ilə heç kim məşğul olmayıb. Azərbaycanın təbii-coğrafi mövqeyi bununla məşğul olmağa, yeni loqistik məhsul ortaya qoymağa imkan yaradır. Bu yol həm də, yaxın və təhlükəsizdir.

    “Astaradan Slavkoya olacaq yolun uzunluğu 3336 kilometrdir. Astaradan Rusiya ərazisindən keçməklə gedən yol isə 4 min kilometrdən çoxdur. Bizim təklif etdiyimiz yeni dəhliz Avropaya çıxış baxımından da sərfəlidir. Yeni yol, eyni zamanda, Rumıniya, Bolqarıstan, eləcə də Türkiyədən keçməklə Avstriya və Londona qədər gedə bilər. Bu həm də 14-cü dəhliz ola bilər”, - deyə C.Qurbanov vurğulayıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi