​“Azərsu” Muğanlı zonasında su təchizatının yaxşılaşdırılması layihəsini reallaşdırır

Bakı. 20 iyun. REPORT.AZ/ “Azərsu” ASC Masallı rayonunun içməli su mənbələri məhdud olan Muğanlı zonasında su təchizatının yaxşılaşdırılması layihəsini həyata keçirir. 

“Report” ASC-nin ictimaiyyətlə əlaqələr şöbəsinə əsasən xəbər verir ki, Masallının Muğanlı zonasında yerləşən yaşayış məntəqələrinin içməli su təchizatının yaxşılaşdırılması layihəsi 24 kəndi əhatə edir.

Layihə çərçivəsində Şərəfə, Həsənli, Hacıtəpə, Sığıncaq, Ərəb, Xırmandalı, Məmmədxanlı, Təkdam, Köçəkli Kürdəbazlı, Eminli, Qarğalıq, Şəhriyar, Dəlləkli, Xallıcalı, Ağakişibəyli, Bala Təklə, Alışanlı, Ətçələr, Birinci Səmədxanlı, İkinci Səmədxanlı, Xoşçobanlı, Mollahəsənli və Qədirli kəndlərində yaşayan 30 mindən çox sakini keyfiyyətli və dayanıqlı içməli su ilə təmin etmək nəzərdə tutulub.

Həmin kəndləri içməli su ilə təmin etmək üçün daha məhsuldar, etibarlı mənbədən istifadə olunması qərara alınan və su mənbəyi Viləşçay hövzəsində inşa edilən sutəmizləyici qurğu seçilib. “Masallı şəhərinin su təchizatı və kanalizasiya sistemlərinin yenidən qurulması layihəsi” çərçivəsində inşa edilən qurğunun tikintisi yekunlaşmaq üzrədir.

Kəndləri içməli su ilə təmin etmək üçün su mənbəyindən müxtəlif diametrli borularla 20 km-ə yaxın magistral xətti inşa edilib. Eyni zamanda 5 kəndi - Şərəfə, Sığıncaq, Məmmədxanlı, Kürdəbazlı və Bala Təklə kəndlərini içməli təmin etmək məqsədilə ümumi uzunluğu 4,5 km su xətləri çəkilib. Hazırda bu ərazilərdə işlər yekunlaşmaq ərəfəsindədir və yaxın vaxtlarda həmin kəndlərə içməli suyun verilməsi təmin olunacaq. Növbəti mərhələdə isə Muğanlı zonasının digər kəndlərində də işlərə başlanılacaq.

Qeyd edək ki, Muğanlı zonasında yerləşən yaşayış məntəqələrində içməli su təchizatı sistemləri mövcud deyil və sakinlər tələbatını fərdi qaydada ödəyirlər.