Bakı. 1 iyun. REPORT.AZ/ "Azərbaycan Xəzər Dəniz Gəmiçiliyi" (AXDG) QSC-də ətraf mühitin mühafizəsi ilə bağlı yeni qaydalar tətbiq olunacaq.
AXDG-dən "Report"a daxil olan məlumata görə, cəmiyyətdə Keyfiyyət, sağlamlıq, əməyin təhlükəsizliyi və ətraf mühitin mühafizəsi Departamenti gəmilərdə formalaşıb yaranan, habelə daşınan müxtəlif aqreqat hallı, o cümlədən maye çirkləndiricilərin idarə olunmasını təmin etməklə, onların dənizə atılmasının qarşısını almaq və ya atqıların həcmini minimuma endirmək məqsədilə yeni prosedur qaydaları hazırlanıb.
Hazırda cəmiyyətin gəmilərində yeni “Plombqırma / Plomblama Qaydaları”nın tətbiqinə hazırlıq işləri gedir. Eyni zamanda, Xəzər Dəniz Neft Donanması və Dəniz Nəqliyyatı Donanmasının rəhbərlərinin və aidiyyəti məsul işçilərinin iştirakı ilə “Plombqırma / Plomblama Qaydaları” mövzusunda məlumatlandırma səciyyəli təlimlər keçirilib.