Yuxarı
    Bağlamaq

    Azərbaycanda sürücülük vəsiqəsi almaq üçün təcrübi imtahan qaydaları dəyişib

    Bununla bağlı Nazirlər Kabineti müvafiq qərar qəbul edib

    Bakı. 11 fevral. REPORT.AZ/ Nazirlər Kabineti “Nəqliyyat vasitələri sürücülərinin hazırlanması və onların ixtisasının artırılması kursları haqqında Əsasnamə”yə və “Nəqliyyat vasitəsini idarə etmək hüququ verən sürücülük vəsiqəsi almaq istəyən şəxslərdən imtahanların qəbul edilməsi və onlara sürücülük vəsiqəsinin verilməsi qaydaları haqqında Əsasnamə”yə dəyişiklik edib.

    “Report” xəbər verir ki, dəyişikliyə əsasən, “B” kateqoriyalı sürücülük vəsiqəsi almaq istəyən şəxs təcrübi imtahanı həm mexaniki, həm də avtomatik transmissiyalı nəqliyyat vasitəsində verə bilər. Mexaniki transmissiyalı nəqliyyat vasitəsində imtahanı müvəffəqiyyətlə vermiş şəxsə mexaniki və avtomatik transmissiyalı nəqliyyat vasitələrini idarə etmək hüququ verilir. Avtomatik transmissiyalı nəqliyyat vasitəsində imtahanı müvəffəqiyyətlə vermiş şəxsə isə yalnız avtomatik transmissiyalı nəqliyyat vasitələrini idarə etmək hüququ verilir.

    Bundan başqa, digər dəyişikliyə görə, həm ölkə vətəndaşlarına, həm də əcnəbilərə və vətəndaşlığı olmayan şəxslərə yol hərəkətinin tənzimlənməsi sahəsində Azərbaycan Respublikasının tərəfdar çıxdığı beynəlxalq müqavilələrə uyğun olaraq, xarici dövlətin səlahiyyətli orqanı tərəfindən verilmiş və etibarlılıq müddəti bitməmiş sürücülük vəsiqəsi əsasında nəqliyyat vasitələrini ölkəyə daxil olduğu gündən bir ay müddətində idarə etmək hüququ verilib. Avtomobili həmin müddətdən artıq idarə etmək üçün sürücülük vəsiqəsi dəyişdirilməlidir.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi