Yuxarı

Azərbaycanda ötən il 524 km uzunluğunda avtomobil yolları tikilib və təmir olunub

Azəravtoyolun sədri Şimal-Cənub nəqliyyat dəhlizi ilə bağlı görülən tədbirlər barədə məlumat verib

Bakı. 14 mart. REPORT.AZ/ Ötən il "Azəravtoyol" ASC ölkənin bütün bölgələrində yol infrastrukturunun yenilənməsi istiqamətində irimiqyaslı layihələr həyata keçirib. 

"Report"un Yeni Azərbaycan Partiyasının (YAP) rəsmi saytına istinadən verdiyi xəbərə görə, "Azəravtoyol" ASC-nin sədri Saleh Məmmədov bildirib ki, 2015-ci il ərzində 524,4 km uzunluğunda ümumi istifadədə olan yeni avtomobil yolları tikilib, yenidən qurulub, təmir olunub, 12 ədəd yeni avtomobil körpüsü, 3 ədəd yol ötürücüsü, 2 ədəd tunel və 9 ədəd piyada keçidi tikilərək istismara verilib. 

Qeyd edək ki, 2015-ci il ərzində Bakı şəhərində 112,1 km təşkil edən 42 adda küçə və prospektdə təqribən 440 min kv.m sahədə əsaslı təmir və yenidənqurma işləri aparılıb.

S.Məmmədov Şimal-Cənub nəqliyyat dəhlizi layihəsi barədə bildirib ki, 2015-ci ildə Bakı-Ələt-Qazax-Gürcüstan sərhədi avtomobil yolunun Kürdəmir-Ucar-Yevlax hissəsinin birinci texniki dərəcəyə uyğun təkmilləşdirilməsi layihəsində son tamamlanma işləri aparılıb. Daha sonra isə Gəncə-Qazax-Gürcüstan sərhədi hissəsinin də yenidən qurulmasına başlanılması planlaşdırılır: "Qeyd edilən layihənin tam reallaşdırılmasından sonra Şərqdən Qərbə və əks istiqamətdə Böyük İpək Yolunun Azərbaycandan keçən hissəsi olmaqla, Bakı-Ələt-Qazax-Gürcüstan sərhədi avtomobil yolu Avropa ilə Asiya arasında avtomobillə beynəlxalq və daxili yük daşımalarının inkişafında daha da mühüm yer tutacaq".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi