Azərbaycan CAREC Proqramı ölkələrinin nazirlər konfransına qatılacaq - YENİLƏNİB

İlk xəbər saat 10:16-da verilib

Bakı. 24 oktyabr. REPORT.AZ/ Oktyabrın 26-da İslamabadda Asiya İnkişaf Bankının (ADB) Mərkəzi Asiya Regional İqtisadi Əməkdaşlıq (CAREC) Proqramı ölkələrinin XV nazirlər konfransı keçiriləcək.

“Report” Pakistan KİV-inə istinadən xəbər verir ki, konfransda Azərbaycanla yanaşı, Əfqanıstan, Çin, Qazaxıstan, Qırğızıstan, Monqolustan, Pakistan, Tacikistan, Türkmənistan, Özbəkistan və Gürcüstan təmsilçiləri iştirak edəcəklər.

Tədbir iqtisadi işlər bölməsinin ADB ilə əməkdaşlığı çərçivəsində keçiriləcək.

Konfransda 10 üzv ölkə və tərəfdaşlardan ümumilikdə 200 nəfərin iştirakı gözlənilir. Beynəlxalq Valyuta Fondu (IMF) və ADB-nin prezidentləri də tədbirə qatılacaq.

Ötən gün Pakistanın maliyyə naziri İşaq Dar konfransa hazırlığın gedişi ilə bağlı iclas keçirib.

Qeyd edək ki, İslamabad toplantısında Azərbaycanı Nəqliyyat Nazirliyi nəqliyyat siyasəti və iqtisadiyyat şöbəsinin əməkdaşları təmsil edəcəklər.