Yuxarı

Astaradan İrana birxətli yeni dəmir yolu çəkilir - FOTO

Bu işlərə sentyabrın əvvəlindən başlanılıb

Bakı. 21 sentyabr. REPORT.AZ/ Astara stansiyasından İranla dövlət sərhəddinə qədər birxətli, 8,3 km uzunluğunda yeni dəmir yolunun çəkilişi davam edir. 

Bu barədə "Report"a "Azərbaycan Dəmir Yolları" QSC-nin Mətbuat katibliyinin rəisi Nadir Əzməmmədov məlumat verilib. 

Məlumata görə, bu işlərə sentyabrın başlanılıb və artıq 5 km yol çəkilib. 

Belə ki, Astara çayı üzərində tikilən üç aşırımlı dəmir yolu körpüsünün dayaqları (4 dayaq) və istinad divarları tikilib. 27 tirdən 15-nin betonu tökülüb, hazırda qalanlarının karkası yığılır. İşlərin ilin sonuna kimi yekunlaşdırılması nəzərdə tutulur.

Xatırladaq ki, aprelin 20-də Azərbaycan-İran sərhəddində, Astara çayı üzərində 82,5 metr uzunluğunda dəmir yolu körpüsünün təməli qoyulub, birxətli yeni dəmir yolu üçün torpaq yatağının hazırlanmasına başlanıb. Bu məqsədlə relyefi mürəkkəb olan əraziyə 100-ə yaxın texnika cəlb olunub, əraziyə 510 000 kub-metr qum, qaya daşı, çınqıl, köhnə dəmir-beton məmulatı döşənib. 

Qeyd edək ki, "Şimal-Cənub" Beynəlxalq Nəqliyyat Dəhlizi haqqında razılaşma Rusiya, İran  və Hindistan arasında 12 sentyabr 2000-ci ildə Sankt-Peterburq şəhərində bağlanıb. Göstərilən dövlətlərdə daxili prosedurlardan keçdikdən sonra razılaşma 21 may 2002-ci il tarixdən qüvvəyə minib. 2005-ci ilin sentyabr ayında Azərbaycan həmin sazişə qoşulub.

Proqnozlar göstərir ki, tam gücü ilə fəaliyyət göstərəcəyi təqdirdə “Şimal-Cənub” Beynəlxalq Nəqliyyat Dəhlizi Avropa ölkələrinin, Rusiyanın, Orta Asiya və Qafqaz regionlarının Fars körfəzi və Hindistana çıxışına, Xəzəryanı ölkələrin Qara dəniz limanları ilə ticarət əlaqələrinin intensivləşməsinə şərait yaradacaq. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi