Yuxarı

Zeynəb Xanlarova ABŞ və Kanadada konsert verəcək

Dünya şöhrətli müğənni martın 12-də ABŞ-a yola düşür

Bakı. 6 mart. REPORT.AZ/ Azərbaycanın və keçmiş SSRİ-nin xalq artisti, dünya şöhrətli müğənni Zeynəb Xanlarova martın 15-də ABŞ-da konsert proqramı ilə çıxış edəcək.

Bu barədə "Report"a Zeynəb Xanlarovanın rəhbərlik etdiyi ansamblın üzvü, musiqiçi Nizami Mirzəyev məlumat verib.

"Xoş gördük əzizlərim" adlı konsert proqramı martın 15-də Nyu-York şəhərindəki 1300 yerlik "Master Theater"də baş tutacaq.

Z.Xanlarovanın rəhbərlik etdiyi ansambl martın 12-də ABŞ-a yola düşəcək.

N.Mirzəyev konsertə ciddi hazırlaşdıqlarını deyib: "Konsertin məşqləri üç ay əvvəl başlayıb. Nyu-York şəhərində ikihissəli möhtəşəm konsert verəcəyik. Sonuncu dəfə 2012-ci ildə ABŞ-da olmuşduq. Zeynəb xanımın konsertləri həmişə gözəl keçir. Budəfəki konserti ABŞ-da fəaliyyət göstərən Azərbaycan diasporu təşkil edib. Nyu-York konsertindən sonra Vaşinqton şəhərində də bir konsertimiz gözlənilir".

Qeyd edək ki, Zeynəb Xanlarova martın 12-dən 19-dək ABŞ-da səfərdə olacaq. ABŞ konsertlərindən sonra Zeynəb Xanlarovanın Kanadada konsert proqramı ilə çıxış edəcəyi planlaşdırılıb.

Konsertdə xalq və bəstəkar mahnıları, muğamlar, təsniflər səslənəcək.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi