Yuxarı

Səyavuş Aslanın 80 illik yubileyi keçirilib

O, 77 illik omur yolunun 60 ilini sənətə həsr edib

Bakı. 25 noyabr. REPORT.AZ/ Azərbaycan Dövlət Akademik Milli Dram Teatrında Azərbaycanın görkəmli teatr və kino aktyoru, "Şərəf" ordenli, xalq artisti Səyavuş Aslanın 80 illik yubileyi keçirilib. 

"Report" xəbər verir ki, Azərbaycan Dövlət Teatr Muzeyi teatrın foyesində görkəmli sənətkarın xatirəsinə həsr edilən foto-sərgini təqdim edib.

Sərgidə Səyavuş Aslanın ömür və yaradıcılıq yolundan bəhs edən fotolar nümayiş etdirilib.

Tədbir Səyavuş Aslanın sənət yolundan bəhs edən videoçarxın nümayişi ilə başlayıb. Mədəniyyət və turizm nazirinin müavini Ədalət Vəliyev Səyavuş Aslanla bağlı xatirələrini bölüşüb: "Səyavuş Aslan Milli Dram Teatra gələndən sonra teatrın repertuarından tutmuş tamaşaçı axınına qədər hər məsələ köklü surətdə dəyişib. Mərhum hər kəslə dil tapmağı bacaran adam idi. Hər kəsə xeyirxahlıq edirdi. Səyavuş Aslan Azərbaycan teatrının sonuncu nəhəng sənətkarlarından idi. Onun haqqında çox danışmaq olar. Ona dünya standartlarına cavab verən aktyor deyiblər. Bu həqiqətdir". 

Azərbaycan Dövlət Akademik Milli Dram Teatrının bədii rəhbəri və baş rejissoru Azərpaşa Nemət isə Səyavuş Aslanı bitkin şəxsiyyət kimi xarakterizə edərək, oynadığı bütün obrazlarda ürəyini qoyduğunu deyib: "Səyavuş Aslan mənim bütün tamaşalarımda baş rolları ifa edib. Sonuncu dəfə mənim quruluşumda "Hamlet" əsərində Poloni obrazını ifa etdi. Mən dostuma Allahdan rəhmət diləyirəm. Səyavuşu 80 yaşında təbəssümlə xatırlayaq".

Tədbirdə həmçinin xalq artistləri - Hacı İsmayılov, Rafiq Əzimov və başqaları sənət dostları haqqında fikirlərini bölüşüblər. 

Xatırladaq ki, Aslanov Səyavuş Məmmədağa oğlu 1935-ci il sentyabrın 5-də Bakıda doğulub. O, aktyorluğa həvəskar kimi dram dərnəyindən başlayıb. 1954-cü ildə qısa müddət musiqili komediya estrada truppasında, 1958-ci ildə Quba Dövlət Dram Teatrında çalışıb.

Uzun illər Azərbaycan Dövlət Musiqili Komediya Teatrının aparıcı aktyorlarından olub. Bir müddət həmin teatrın bədii rəhbəri işləyib.

1984-cü ildən ömrünün sonunadək Akademik Milli Dram Teatrında çalışan Səyavuş Aslan ağır xəstəlikdən sonra 2013-cü il iyunun 27-də Bakıda vəfat edib.

Səyavuş Aslan 77 illik omur yolunun 60 ilini sənətə həsr edib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi